Shumë njerëz po kërkojnë emocionin e të zbuluarit rastësisht një perlë të fshehur gjatë pushimeve, duke preferuar përvoja më autentike jashtë destinacioneve masive turistike. Ky trend po vërehet sidomos mes turistëve britanikë, sipas ABTA-s, shoqatës së agjentëve britanikë të udhëtimit, e cila raporton se dy në pesë britanikë planifikojnë të vizitojnë këtë vit një vend ku nuk kanë qenë kurrë më parë.
Sipas një artikulli të BBC, Shqipëria po fiton gjithnjë e më shumë vëmendje si një destinacion i tillë. Blogerja e udhëtimeve, Amber Robertson, shpjegon se Shqipëria është e lehtë për t’u arritur dhe ofron një përvojë unike.
“Mund të fluturosh për në Korfuz, pastaj të marrësh një traget gjysmë ore për në Sarandë – kjo është një hyrje perfekte për të zbuluar ‘Rivierën Shqiptare’”, tha ajo.
Plazhet me ujë ngjyrë turkeze dhe rërën e bardhë të Shqipërisë janë krahasuar me ato të Maldivëve, ndërsa qytete historike si Berati dhe Gjirokastra ofrojnë kulturë dhe histori të pasur për vizitorët.
“Ke plazhe vërtet të bukura dhe klube plazhi që japin ndjesinë e Greqisë, por me një çmim më të lirë. Për të rinjtë dhe turistët me buxhet më të kufizuar, vlera është një nga atraksionet kryesore – paratë tuaja shkojnë shumë më tej”, shton blogerja.
Përveç plazheve dhe historisë, Shqipëria tërheq edhe familje dhe vizitorë me interesa të veçanta falë faunës së saj të egër dhe natyrës të paprekur. Ky kombinim i bukurive natyrore, kulturës dhe kostoja e përballueshme po e bën Shqipërinë një destinacion gjithnjë e më tërheqës për turistët që kërkojnë përvoja autentike jashtë kurtheve tradicionale turistike.
