Deputeti i sapo-zgjedhur i Partisë Demokratike, Klevis Balliu, ishte i ftuar në emisionin “Të Paekspozuarit” në MCN TV, ku “luftoi” ashpër me të gjithë analistët e ftuar, për të shpjeguar “vjedhjen e zgjedhjeve” nga Edi Rama.
Analisti Baton Haxhiu, i tha Balliut se Sali Berisha ka fituar por PD ka humbr, ndërkohë që e pyeti edhe për “narracionin e PD-së” për të ardhmen. Balliu nuk pati ndonjë përgjigje konkrete për narracionin por deklaroi se ka patur vjedhje.
Pjesë nga biseda:
Baton Haxhiu: E kuptoj përshkrimin dhe situatën e denoncimit, por mund të konstatoj se fituesi i vetëm i zgjedhjeve është vetëm një njeri, Sali Berisha. I njoh pesë liderë që kanë patur përplasje brenda partive që janë zhdukur dhe nuk ekzistojnë më. Disa prej emrave kryesorë, Boris Tadiç, Gruevski, një në Sllovaki, e me rradhë. I vetmi që riktheu vetën, që ishte i humbur, është Sali Berisha. Si individ në një betejë brenda të djathtas ai është fituesi.
Por, humbësi është Partia Demokratike. Ma bëj dallimin e kësaj narrative, a mundet që një individ që kishte ikur nga politika të jetë fitues dhe PD të jetë humbëse? Cili është narracioni që në të ardhmen ta shndërroni, fitoren e individit dhe humbjen e partisë në një fitore të ardhshme?
Klevis Balliu: Në mendimin tim, një kryetar apo një parti dhe anëtarët e një partie nuk mund të kenë fitore apo dështime të veçanta. Humbja është e të gjithëve ne. Këtu është edhe më e gjerë, këtu kemi humbur si shoqëri. Është mbajtur edhe 4 vite kjo qeveri dhe nuk pret asgjë asnjë shqiptar. Ka vetëm frikë që mund të ikim edhe 200 mijë shqiptarë të tjerë. Sa i përket analizës për individin Berisha, ai është unikal dhe bën diferencën. Ai u rikthyer pas sulmit kombëtar dhe mafias. Por pati një gjë të ndryshme, ai u riktye me votë. Tani ne nuk kemi votë dhe zgjedhje. Procesi brenda PD erdhi me zgjedhje. Më frikëson që ne të normalizohemi me krimin.
Baton Haxhiu: Ne kemi fitoren e një individi brenda PD, rikthimin e tij, betejë tre vjeçare. Në momentin kur fitoi, rrëfimi i PD mungoi, rrëfimi i një individi në zgjedhje. Kjo solli stabilitetin e një individi, përtej kësaj nuk ka asgjë. Ne dimë se çfarë ndodh para zgjedhjeve. Vjedhje ditën e dielë nuk ka në Shqipëri. Këto gjëra përgatiten 5-6 muaj më herët. Cili është rrëfimi i Partisë Demokratike përtej individit fitues, Berisha?
Klevis Balliu: Nëse ka vjedhje nuk ka vend për analiza të tjera.
Baton Haxhiu: Nuk ka vjedhje, ka një ritual manipulimi që zgjat, ndaç quaje patronazhim, por dua të them, përtej këtyre, cili është rrëfimi i PD?
Klevis Balliu: Nëse ju pranoni vjedhjen…
Baton Haxhiu: Nuk e përmend unë fjalën vjedhje.
Klevis Balliu: Nëse pranon se ka vjedhje, nuk diskutohet asgjë tjetër.
