Dua Lipa më 10 gusht në Tiranë. Këngëtarja me origjinë nga Kosova do të jetë në kryeqytetin shqiptar për t’u bërë pjesë e një koncerti në Sheshin “Nënë Tereza”. Ajo është ftuar nga Bashkia e Tiranës ndërsa do të performojë në një koncert që do jetë falas për të gjithë fansat e saj. Ardhja e saj në kryeqytetin shqiptar është bërë e ditur nga vet kryetari i Bashkisë së Tiranës, Erion Veliaj nëpërmjet një statusi në rrjetin social facebook.
“Sa bukur! Do mbyllim vitin tonë të parë në Bashki me Dua Lipa në Tiranë. Shihemi të gjithë në 10 Gusht tek Sheshi Nënë Tereza në një koncert të hapur falas për të gjithë!”, – shkruan Veliaj në rrjetin social “Facebook”.
Ndërkohë që ardhjen e saj në Tiranë e konfirmon edhe vet këngëtarja me anë të një postimi në twitter, ku shprehet e lumtur që do jetë në koncert në dy qendrat e shqiptarisë. Dua Lipa bënë të ditur se ndalesa e parë do të jetë toka mëmë, siç e quan ajo, Prishtinën, ndërsa më pas do jetë në Tiranë.
“Jam shumë e emocionuar të njoftoj se do të shtoj edhe një tjetër datë ndërsa jam në tokën mëmë, në Prishtinë të Kosovës, do të shkoj edhe në Tiranë në 10 gusht për një show. Jam shumë gati, shpresoj të jeni edhe ju. Shihemi së shpejti Tiranë”, shkruan ajo një postim në Twitter.
Dua Lipa, shqiptarja e lindur në Londër, është e njohur tashmë jo vetëm si këngëtare por edhe si modele e tekstshkruese ndërsa ka bashkëpunuar me këngëtarët më në zë të momentit. Koncerti do të jetë i hapur dhe falas për të gjithë qytetarët që do t’i bashkohen këtij koncerti më 10 Gusht në sheshin “Nënë Tereza”.
