Bashkia e Tiranës është e vendosur që të kthejë në çdo rrugë dhe lagje të qytetit ligjshmërinë në raport me hapësirat publike dhe ambientin e pastër. Në vijim të aksionit të saj të nisur prej disa ditësh tashmë, Policia Bashkiake ka inspektuar sot një sërë zonash ku dhe ka ndëshkuar shkelësit e ligjit, të cilët nuk i janë bindur thirrjes së Bashkisë për të liruar hapësirat e zëna në mënyrë të paligjshme.
Kështu, janë gjobitur një sërë subjektesh tregtare që ushtronin aktivitet duke zënë trotuaret dhe rrugët në zonën e Pedonales, përgjatë bulevardit “Bajram Curri” dhe në akse të tjera. Gjithashtu, kanë vijuar edhe masat ndëshkuese me gjobë edhe për ata që ndotin ambientin.
Në vetëm një javë në Njësinë 5 janë vendosur më shumë se 170 gjoba, çka tregon seriozitetin e Bashkisë për t’i shkuar kësaj nisme deri në fund. Gati një javë më parë Bashkia publikoi një paketë masash për të gjitha ata që vandalizojnë ambientet publike, duke parashikuar si gjobitje për shkeljen e bërë ashtu edhe dëmshpërblim për kthimin e hapësirës së dëmtuar në normalitet. 
