Kryetari i Partisë Demokratike, Lulzim Basha, prezantoi kandidatët për kryetarë bashkie në Lushnje Darien Xhindoli, në Kavajë Engjëll Cara, në Rrogozhinë z.Eqrem Deliu dhe Divjakë Irakli Gorea.
Kryetari i Partisë Demokratike theksoi se vota e 21 qershorit është dhe duhet të jetë vota plebishitare e ndarjes nga politika e lakut në fyt dhe politikës së gabuar që ka çuar qytetarët në kufijtë e mbijetesës. Sipas tij, ndërsa qytetarët përballen me sfidën e bukës së gojës dhe të vetmen shpresë kanë emigrimin, kryeministri turist bredh nga njeri vend i botës në tjetrin duke injoruar një popull të tërë të cilin e ka zhytur në varfëri dhe mjerim.
“Ne sot përballemi me qytetarët në Lushnje dhe në gjithë Shqipërinë, që nga mungesa e shpresës kanë marrë rrugët e kurbetit. Qytetarët ikin nga varfëria, Edi Rama ikën sepse nuk do të dëgjojë dhe nuk do të shikojë sepse nuk ia ndjen për problemet e qytetarëve. Le t’i japim fund këtij regjimi të pashpirt. Asnjë të mos qëndrojë në shtëpi, të gjithë bashkë, të djathtë e të majtë t’i themi jo skllavërisë së re” – tha Basha.
Nga Kavaja kryetari i PD-së theksoi se bashkimi i shqiptarëve do ta ndalë të keqen dhe krimin që ka depërtuar deri tek nivelet më të larta të drejtimit të qeverisjes. Ndërkohë që në Rrogozhinë qytetarët i shprehën z.Basha revoltën e tyre për prishjen e ndërtimeve që sipas tyre janë prishur pa asnjë paralajmërim dhe pa asnjë kompesim.
