Ambasadori Amerikan, Donald Lu dhe ambasadori i OSBE-së, Borschard vijojnë angazhimin e tyre për finalizimin e reofmrës në drejtësi. Gjatë ditës së sotme diplomatët kanë shkuar në selinë blu, për t’u takuar me kreun e PD-së, Lulzim Basha.
Takimi mes kreut te demokrateve dhe dy ambasadoreve zgjati rreth 90 minuta.
“Zhvillimet e fundit, ku ministra të qeverisë kanë konfirmuar problemet e ngritura nga opozita për kriminalizimin e qeverisjes, të shtetit, të pushtetit lokal, të policisë në funksion të zgjedhjeve të ardhshme, faktet e dala për lidhjen e figurave kryesore të mazhorancës me kokat e krimit të organizuar, janë dëshmi e fuqizimit të krimit dhe mosshkëputjes së mazhorancës nga krimi. Po ashtu, refuzimi për të pranuar votimin dhe numërimin elektronik, është provë e qartë e mungesës së vullnetit nga ana e mazhorancës për zgjedhje të lira e të ndershme”, thuhet ne njoftimin e shtypit te PD-se.
Kryetari i Partisë Demokratike, Lulzim Basha, u bëri të qartë ambasadorëve se opozita është e vendosur të bëjë gjithcka për të siguruar zgjedhje të lira e të ndershme.
“Votimi dhe numërimi elektronik është e vetmja rrugë për kthimin e besimit tek vota e lirë. Të njëjtën rëndësi për të siguruar zgjedhje të lira ka edhe zbatimi i dekriminalizimit, liria e medias, dhe transparenca mbi financat e fushatës zgjedhore. Zgjedhjet e lira e të ndershme, janë një nevojë jetike për stabilitetin dhe të ardhmen e Shqipërisë”, tha Basha./a.m.
