Kryetari i Partisë Demokratike Lulzim Basha ka akuzuar dy krerë të policisë në Gjirokastër dhe Korçe, Ajet Zyberin dhe Arianit Arapin, si të përfshirë të drejtpërdrejtë në trafikun e drogës. Lideri demokrat thotë se këto pretendime që po ngren opozita janë faktuar nga partnerët e huaj dhe se po ashtu edhe Ministri i brendshëm Sajmir Tahiri është kapur duke u justifikuar tek trafikantët e drogës, kur sasitë e lëndëve narkotike janë kapur.
“Qelbet shteti i Edi Ramës, por ai është krenar, thotë se kjo është era shtet. A do jetë krenar pas fakteve që publikojmë sot, për faktin se dy drejtorë të policisë së Korçës dhe Gjirokastrës janë të implikuar drejtpërdrejt me trafikun e drogës. Arianit Arapi dhe Ajet Zyberi janë raportuar nga partnerët për lidhje me krerët e trafikut të drogës, biznesmenëve të trafikut të hashashit. Kjo është era e rënies së shtetit në duart e mafias”,- akuzoi Basha.
Në këto kushte, për kryedemokratin nuk mbetet gjë tjetër vetëm që populli të çohet në këmbë dhe të largojë qeverinë e korruptuar të kryeministrit Rama.
“Era shtet është kjo? Të kesh parcela të tëra me drogë që ruhen nga persona të armatosur dhe të veshur me uniformë. Kjo është era krim, cdo qytetar e shikon vetë, e di se kjo është përmasa e një regjimi kriminal, e një miksimi qeveri dhe krim që i ka zënë frymën vendit. Bashkë me qytetarët kemi detyrën dhe të drejtën ta largojmë një orë e më parë”,- tha lideri demokrat.
