Nga Armando Meta
Ajo që përflitej prej kohësh për një plasaritje në marrëdhëniet mes kryetarit aktual të PD Lulzim Basha dhe mentorit të tij Sali Berisha, duket se tashmë është ravijëzuar qartazi. Rebelimi i disa deputetëve të PD kundër televizionit Klan me në krye Bashën, ka bërë që për kompensim nga ana tjetër Berisha t’i kundërpërgjigjet këtij sulmi duke përgojuar Top Channel për shifrat e audiencës.
E gjithë kjo situatë mori shkas pas një përpjekje të pronarit të TV Klan, Aleksandër Frangajt, për të bërë një ndërtim në zonën bregdetare që mban emrin “Laguna Blu”. Në këtë zonë kanë shtëpitë shumë deputetë të PD deri dhe kryetari i kësaj force politike, Basha. Por sa parimore janë sulmet e Bashës dhe të deputetëve të PD-së në adresë të Frangajt dhe përse Berisha përpiqet që në këtë shpërthim anti-Klan të gjejë formula kompensimi duke sulmuar Top Channel?
Në fakt sulmet e PD-së kundër Frangajt në thelb nuk kanë asgjë parimore, aq më shumë thirrjet e saj në adresë të TV Klan për pasqyrim me objektivitet të lajmeve apo deklaratave të saj për shtyp. Për hir të së vërtetës, në jo pak raste TV Klan ka cënuar integritetin e lajmeve sidomos në kohën kur PS ishte në pushtet dhe PD në qeveri. Por asnjëherë nuk pati ndonjë reagim nga PD lidhur me cënimin e standarteve profesionale të gazetarisë. Madje në shumicën e rasteve ishin vetë krerët më të lartë të PD që fërkonin duart deri dhe nxisnin në këtë deformacion.
Marrëdhniet mes PD dhe TV Klan nuk kanë qenë kurrë mbi baza profesionaliteti. Reagimi i ashpër i disa deputetëve të PD më shumë se për kritere profesionale kundër Frangajt, lidhet qartësisht me problem personale që ata kanë me të sa i përket ndërtimeve te “Laguna Blu”.
Nga ana tjetër Berisha nuk dëshëron ti shkëpusë të gjitha lidhjet që ndër vite skaliti me TV Klan. Ai pa shumë elegancë, siç është edhe në natyrën e tij, ka zgjedhur që t’i japë një dorë TV Klan duke sulmuar Top Channel. Për hir të realitetit, Berisha është ndër të vetmit ish-presidentë apo ish-kryeministra në këtë planet që merret me shifrat e audiencës që kanë kanalet televizive. Por përtej këtij realiteti ku Basha sulmon Klanin dhe Berisha nga ana tjetër i kundërpërgjigjet duke sulmuar Top Channel, zbulon skicimin e një plasaritje jo të vogël mes dy liderëve që drejtojnë PD-në.
Dyzimi në qëndrime, puna me dy zyra shtypi në PD, ku njëra është e Bashës dhe tjetra e Berishës, ka nxjerrë në pah një përpjekje të Bashës për të pasur një profil të tijin jashtë diktatit të Berishës, gjë që ka çuar dhe në krijimin e këtij dualizimi politik. Në një vështrim mund të duket se në PD “njëri i bie gozhdës dhe tjetri patkoit”, por në fakt kjo përplasje mes dy drejtuesve të PD-së vetëm sa zbardh majën e ajsbergut të diferencimeve në qëndrime që ka Basha dhe Berisha.
Rast i TV Klan apo sulmi i Berishës ndaj Top Channel vetëm sa zbulon një pjesë të këtij dualizimi. Basha duket se e ka të qartë tashmë se me Berishën mund të mbijetosh në PD, por nuk mund të fitosh kurrë më zgjedhje.
