Kërkesa për kredi në sektorin bankar pësoi rënie në gjysmën e dytë të vitit të kaluar, ndërsa bankat gjithashtu rritën shkallën e refuzimit të aplikimeve nga klientët.
Sipas informacionit të Bankës së Shqipërisë, bankat raportuan se morën gjithsej 73,749 aplikime për kredi në gjashtëmujorin e dytë 2025. Numri i aplikimeve ra me 2.5% krahasuar me të njëjtën periudhë të një viti më parë, e ndikuar kjo kryesisht nga ulja e numrit të aplikimeve nga individët. Në numër, aplikimet për kredi dominohen nga individët, me më shumë se 90% të totalit, ndërsa 10% janë aplikimeve të bizneseve.
Norma totale e refuzimit të aplikimeve ishte 31.6%, duke u rritur me 1.3 pikë përqindje krahasuar me gjashtë muaj më parë dhe me 4.1 pikë përqindje krahasuar me një vit më parë. Në numër, kjo përkthehet në afërsisht 23 mijë aplikime për kredi të refuzuara.
Në të dy periudhat krahasuese, kjo rritje ka qenë më e theksuar në rastin e sektorit të ndërmarrjeve të vogla dhe të mesme dhe individëve.
Norma totale e refuzimit ka rezultuar në rënie të lehtë për bankat me kapital vendas dhe ka mbetur pothuaj e pandryshuar tek ato me kapital të huaj.
Vihet re se gjatë periudhës, dy grupet bankare kanë shfaqur qëndrime të ngjashme ndaj kërkesave për kredi të ndërmarrjeve të vogla dhe të mesme, duke vijuar prirjen shtrënguese krahasuar me periudhën paraardhëse dhe krahasuar me një vit më parë.
Ky qëndrim është ndjeshëm më i dukshëm tek bankat e huaja, të cilat kanë refuzuar rreth 21% të kërkesave të këtij segmenti, krahasuar me bankat vendase, ku kjo normë ka rezultuar 7%.
Gjithashtu, të dy grupet e bankave vijojnë të kenë qëndrime shtrënguese ndaj segmentit të individëve, por ndërkohë që norma e refuzimit të kërkesave të tyre gjatë periudhës ka mbetur pothuaj e pandryshuar në rastin e bankave të huaja, ky tregues është rritur ndjeshëm në rastin e bankave vendase duke arritur në 26% (nga 18% e rezultuar në gjashtëmujorin e kaluar dhe 9% e rezultuar një vit më parë). Nga ana tjetër, të dy grupet e bankave mbeten të fokusuara në kreditimin e ndërmarrjeve të mëdha, duke refuzuar vetëm 3% – 4% të kërkesave të tyre për kredi.
Megjithëse statistikat treguan një rritje me ritme të larta të kreditimit edhe për vitin e kaluar, ecuria e shkallës së refuzimit të kërkesave për kredi tregon se bankat kanë filluar të shfaqin një qasje më të kujdesshme. Rritja e shkallës së refuzimit të kredive ka ardhur në vijim të hyrjes në fuqi të masave shtrënguese të vendosura nga Banka e Shqipërisë në kredinë për blerje banesash nga individët. (Marrë nga Monitor)
