Rajoni i Ballkanit kërcënohet nga më shumë se katër mijë xhihadistë, thonë njohësit e problemit të terrorizmit, duke u mbështetur në të dhënat e shërbimeve informative. Sipas medieve boshnjake, strofulla kryesore e tyre ndodhet në Bosnjë. Tashmë është zyrtare se vrasja e dy ushtarëve në Sarajevë ishte akt terrorist i ekstremistëve fetarë vehabi, transmeton Koha.net raportimet e këtyre medieve.
Në BeH organet e ndjekjes po “krehin” strofullat e identifikuara të vehabive ekstremë dhe po mbajnë nën vëzhgim më shumë se 200 ilamistë më radikalë, posaçërisht 50 sish të kthyer nga fushëbetejat e Sirisë e të Irakut. Bëhet e ditur se në këtë vend, BeH, janë rreth 3.500 vehabi.
Të dhënat flasin se përveç islamikëve nga BeH, kërcënim për sigurinë në Ballkan paraqesin edhe xhihadistët nga Sanxhaku e Kosova, që po luftojnë në Siri. Sipas të dhënave të shërbimeve informative nga këto vende janë mbi 400 xhihadistë. Ata përbëjnë bërthamën e lëvizjes së gjerë vehabiste në Ballkan që financohet nga Vjena, ku ndodhet qendra më e madhe e islamikëve radikalë në këtë pjesë të Europës.
