Ballistët i ankohen Ruçit për demokratët: Duam zyra, s’dalim dot në rrugë se na quajnë tradhtarë

Deputetët e opozitës e re në Parlament po hasin në vështirësi në takime me bazën, pasi nëpër qytete po cilësohen si tradhtarë.

Shqetësimi i tyre është ngritur në mbledhjen e fundit të Konferencës së Kryetarëve. Deputeti i Ballit Kombëtar, Adriatik Alimadhi në mbledhjen e datës 14 tetor, e zhvilluar me dyer të mbyllura, duke iu drejtuar Ruçit u shpreh:

“Zoti Kryetar, në seancën plenare të kaluar, së bashku me deputetin Zef Shtjefni paraqitëm disa problematika, lidhur me kontaktet me qytetarët. Kur shkoj në takimet në zona kemi një problem, pasi nuk kemi zyra, sekretarë. Është shumë e vështirë kontakti me qytetarët, duke parë dhe situatën politike”.

Kryeparlamentari nga ana e tij ka theksuar se në shkallë qarku janë ngritur 12 zyra për grupin e mazhorancës dhe të opozitës. E gjithë opozita pavarësisht se si përbëhet ka një zyrë të përbashkët, ndërsa mazhoranca 12 zyra më vete.

Deputeti ballist nuk është ndalur me kaq, ndërsa i ka shprehur shqetësimin se nuk mund të organizojë takime në Vlorë, pasi e sulmojnë dhe zyrat e opozitës i ka nën kontroll grupi tjetër, ai “Demokrat”.

“Sikurse e shpreha, se situata politike është shumë e vështirë. Unë shkoj në Vlorë dhe njerëzit më sulen si tradhtar e ku di unë çfarë tjetër. Ku do ulemi ne dhe ku do kontaktojmë, pasi nuk mund të ulemi në terren dhe nëpër kafe! Të dy grupet parlamentare i kanë ndarë zyrat, për ne nuk ka asgjë. Të shikohet mundësia, sepse situata politike është problem për ne dhe jo për ju”, theksoi Alimadhi.

/a.r