“Lulzim Basha është zyrtarisht nën hetim për “kallëzim të rremë të kryer në bashkëpunim” me shpifës Nuhun, nesër do depozitojë kallëzim për Salianjin ”, ka deklaruar sot kryetari i grupit Parlamentarë të PS-së Taulant Balla.
Në vijim, Balla duke iu përgjigjur liderit të opozitës Basha në lidhje me ngjarjen e Fushë-Krujës i kujton qëndrimin e opozitës një ditë më parë në Bruksel, ku thekson se u turpërua Shqipëria.
“Pse nuk shkon PD t’i shohë kamerat e komisariatit dhe praninë time në komisariatin e Fushë-Krujës, apo edhe të vetë Nuhut? Ti Lulzim si person në hetim ke të drejtë t’i shohësh. Apo hajt se do harrohet. Nuk e le unë në harresë, Lulzim! Sepse dje turpërove Shqipërinë aspak mua, me një paçavure që i dhe të lexojë Pollua”, shton ai.
Po ashtu, Balla i kujton kryetari të PD-së se nesër do të depozitojë kallëzim penal në Prokurorinë e Krimeve të Rënda kundër tij, Ervin Salianjit dhe Florenc Hoxhës.
“Edhe Ervin Salianji është zyrtarisht në hetim bashkë me Babale&co. Nesër tek Prokuroria e Krimeve të Rënda depozitoj kallëzim të plotë për vepra penale të kryera në bashkëpunim për Lulzim Bashën, Ervin Salianjin dorë për dore me Florenc Hoxhën, pazarxhinjtë e sëmurë që ranë brenda në kurthin që ngritën vetë me ca personazhe qesharakë e që nuk ka alibi që i shpëton”, shpjegon Balla.
Gjithashtu, Balla deklaron se do t’i shkojë deri në fund kallëzimit penal sepse shqiptarët duan të vërtetën.
“Ti Lulzim duhet të sqarosh pazaret me këta persona, të bëra në SHQUP apo në oborrin e SHQUP-it. Kallëzimi dhe çdo informacion tjetër është në diszpozicion të Prokurorisë, sepse shqiptarët duan të dinë të vërtetën sa më shpejt. Luli kërcen nga një degë në një degë, nga një gënjeshtër në tjetrën. Turp s’ka. Lulzim mos kërko marrëveshje për t’u tërhequr nga kallëzimet. Do t’i shkojmë deri në fund secilës prej shpifjeve”, shprehet Balla.
/b.d
