Drejtuesi Politik i PS për Diasporë, Taulant Balla, ka qenë i pranishëm në një nga zyrat e kompanisë postare DHL në Athinë. Nga aty socialisti u bëri thirrje të gjithë emigrantëve që të shfrytëzojnë të drejtën e tyre të votës, përgjatë këtyre 5 ditëve të mbetura, e të dorëzojë zarfat pranë DHL, Kurier apo Speedex.
“Edhe pesë ditë mbeten për të postuar votën tuaj për Shqipërinë Europiane. Dua t’i bëj një thirrje të gjithë bashkatdhetarëve tanë në mbarë Greqinë, jo vetëm këtu në Athinë, që të shfrytëzojnë pesë ditët e mbetura për të dërguar pranë zyrave të DHL, Kurier apo Speedex zarfet me fletët e votimit.”,” tha ai.
Balla ka ndjekur nga afër në disa zona të Greqisë dhe Athinës procesin e pjesëmarrjes së diasporës në zgjedhjet e 11 majit. Ai ka vlerësuar dhe shprehur mirënjohjen për angazhimin e diasporës në këtë moment historik për demokracinë dhe për përmbylljen e anëtarësimit të Shqipërisë në Bashkimin Europian.
Në dalje të pikës së DHL, Balla falënderoi të gjithë emigrantët që u angazhuan në këtë proces, duke theksuar:
“Sipas Komisionit Qendror të Zgjedhjeve, janë ende rreth 6,000–7,000 fletë votimi të pashpërndara, por unë besoj dhe shpresoj që edhe ato do të shpërndahen për ta përmbyllur me sukses procesin, në Greqi dhe në mbarë botën, kudo që janë shqiptarët. Ata që u regjistruan për të marrë pjesë në zgjedhj, çerek milioni shqiptarë përbëjnë një arritje të madhe, një fitore për demokracinë tonë dhe këtë moment historik“, shprehet ai.
Balla përgjatë kësaj fushate elektorale, ndodhej shpesh në Greqi, pasi kompania postare e kontraktuar nga KQZ-ja ka hasur disa problematika përgjatë shpërndarjes së zarfave, duke udhëzuar emigrantët të paraqiten vetë në zyrat e DHL-së.
