I ashpër është treguar sot deputeti socialiste Taulant Balla, teksa i kërkoi Prokurorisë të nisi hetimet për lejen e pallatit 16-katësh prapa ‘Sky Tower’.
Duke folur në një konferencë për media, Balla ngriti pyetjen se ‘a është ky klientelizëm dhe shpërdorim me pushtetin ky rast’?
“Njeriu i cili mungonte prej dy vitesh në Këshill Bashkiak dhe punonte si kryetar bashkie në distancë herë nga SHQUP-i dhe herë nga Holanda, krejt papritur u kthye në zyrë për të rinovuar lejen e ndërtimit” – tha deputeti socialist.
Në fjalën e tij, Balla tha se rinovimi i lejes është tradhtia e fundit e Bashës për Tiranën duke treguar se e vetmja gjë që i interesonte ishte të abuzonte sa më shumë.
“Pas meje u bëftë qameti është moto e Lulzim Bashës. Shqiptarët e njohin mirë pasi është njëriu që kudo shkel lë vetëm shkretëtirë. Shkatërroi bashkinë dhe e zhyti në borxhe. Si ministër i Brendshëm vrau 4 qytetarë. Si ministër Transportesh vodhi 230 milionë euro në Rrugën e Kombit. Si ministër i Jashtëm, fali detin’ – tha Balla.
Ai i bëri thirrje Prokurorisë që të nisë urgjentish hetimet për pallatin 16 katësh në qendër të Tiranës.
“Ky njeri që i ka bërë bisht gjykatës përmes raporteve mjekësore duke u shtrirur si i sëmurë, është koha të paraqitet para drejtësisë” – përfundoi deputeti Taulant Balla. (javanews.al / a.r)
