Taulant Balla, drejtuesi politik i PS në Qarkun e Elbasanit për zgjedhjet e 25 Qershorit, zhvilloi një takim elektoral me minatorët e qytetit të Përrenjasit.
Në bashkëbisedimin që pati me minatorët, Balla i premtoi atyre se, menjëherë pas fillimit të punës së parlamentit të ri, do të bëhet i mundur miratimi i ligjit për statusin e minatorit.
Në fjalën e tij, deputei Balla u shpreh: “Ne nuk e gjetëm Shqipërinë siç mendonim se do ta gjenim. Ne e gjetëm Shqipërinë minimalisht me financa në nivelin zero. Do kishim qenë mirë, po e gjetëm Shqipërinë të zhytur në borxhe. E gjetëm ekonominë, financat e vendit në minus 726 mln euro. E plot tre vite të qeverisjes tonë, na u desh plot 3 vite që të shlyenim borxhet që kishim trashëguar nga 8 vite të qeverisë së kaluar.”
“Në 2013, – vijoi më tej Balla, – ne e gjetëm skemën e pensioneve në ditën e vet më të zezë. Nëse në 89’ kishte 9 veta në punë dhe 1 në pension, në 2013 kishte një në punë dhe një në pension. “Skema e pensioneve ishte dhe dëmi më i madh. Në 2013, ne gjetëm skemën e pensioneve në ditën më të zezë. Dhe po jua thotë Taulanti, në 2014 ne kishim hyrë në pamundësinë për të aktivizuar pensionet,”- u shpreh deputeti socialist.
Për drejtuesin politik të Elbasanit tashmë shteti shqiptar i ka kushtet financiare për të vazhduar me rritjen e pensioneve. Ndaj ai në këtë takim i ftoi minatorët e pranishëm që, me parlamentin e ri, që në fillim të shtatorit të ndërmarrin nismën për depozitimin e projektligjit për statusin e minatorit dhe të metalurgut.
“Unë kam bërë para 4 ditësh një marrëveshje me metalurgët, për të bërë të njëjtën gjë edhe me ju, që Shqipëria tashmë i ka kushtet ekonomike. Skema e kontributeve shoqërore i ka kushtet financiare. Qeveria e Edi Ramës pas 25 Qershorit i ka kushtet që ne të depozitojmë në parlament. Në 9 shtator bëhet votimi i parlamentit. Mbas datës 9 shtatorit do të miratojmë një ligj për statusin e minatorit dhe të metalurgut; është e vetmja mundësi për rikuperuar gabimet e së shkuarës, sepse janë dy kategori sociale, përfshi këtu dhe gjeologët. Unë këtu jam i gatshëm, me sindikatën, bashkë me deputetët e Pogradecit, të Korçës, të Bulqizës, të Kukësit, por këtë iniciativë për t’i bindur këta deputetë jam unë. Këtë iniciativë në mënyrë simbolike do ta depozitojmë së bashku. Unë mund t’ju them se kjo është zgjidhja më e mirë që ne kemi së bashku: ta bashkëfirmosin këtë dokument në parlament për statusin e minatorit dhe të metalurgut dhe ta formalizojmë ashtu siç i ka hije kësaj shtrese të nëpërkëmbur 25 vjet,”- përfundoi Balla.
I pranishëm në këtë takim, Llazi Kerxhalli, pishtar i Demokracisë dhe mbrojtësi më i madh i të drejtave të minatorëve përshëndeti këtë nismë dhe i ftoi të pranishmit të përkrahin alternativën e Partisë Socialiste të Shqipërisë. “Ne tashmë do nënshkruajmë një aktmarrëveshje për statusin e minatorit dhe të metalurgut dhe sigurisht minatorët, metalurgët dhe gjeologët e Shqipërisë (sepse ashtu e kemi patur edhe vulën e parë: minatorët, metalurgët, pasuruesit në të gjithë Shqipërinë).
Të nënshkruet kjo dhe pas nënshkrimit të saj, unë ju jap fjalën që në krye tuaj do të jem në derën e parlamentit ditën e dytë, bashkë me ju. Jemi shtresa më e vuajtur, edhe në qoftë se ne do t’jua japim votën, kemi të drejtën edhe sy e faqe që në ditën e dytë të parlamentit ne të jemi atje.
Unë i bëj thirrje të gjithë minatorëve, metalurgëve dhe pasuruesve që të bashkangjitemi për Shqipërinë që duam,” – përfundoi Kërxhalli.
