Kuvendi i Shqipërisë rrëzoi edhe dy dekrete të Presidentit Ilir Meta, i cili i kishte kthyer për rishqyrtim në Kuvend.
Pas diskutimeve, u hodh në votim dekretet e Metës për ndryshimet në Kodin Penal dhe ligjin për Akademinë e Shkencave.
Kuvendi rrëzoi dekretin e Metës për Kodin Penal.
Po ashtu u rrëzua edhe dekreti i Metës për ligjin për Akademinë e Shkencave.
Para se Kuvendi i Shqipërisë të rrëzonte edhe dy dekrete të Presidentit Ilir Meta, i cili i kishte kthyer për rishqyrtim në Kuvend, foli kryetari i grupit parlamentar të Partisë Socialiste, Taulant Balla.
Ai u ndal tek projektligji i kthyer për rishqyrtim në Kuvend për Kodin Penal nga ana e Presidentit të Republikës, Ilir Meta.
Balla risolli rastet e dhunës në stadiume, dhunës ndaj mjekëve dhe policëve dhe deri tek prishja e qetësisë publike. Ai theksoi se këto nuk do të ndodhnin nëse Meta nuk do shkaktonte vonesa për hyrjen në fuqi të ndryshimeve në Kodin Penal.
“Nëse ky ligj do kishte hyrë në korrik apo gusht, në shtator do të kishim pasur rastet e para për personat abuzues. U vonuam dy muaj, për arsyen që dihen sepse presidenti e ka pozicionuar presidencën në njërën prej selive të opozitës.”
“Prej sot nuk do të guxojë askush, sepse do të shkojë në kokërr të burgut ata që abuzojnë me sigurinë ushqimore, mashtrimin për cilësinë apo origjinën e produktit. Dhuna në stadiume, nëse do të ishte miratuar ndryshimet në Kodin Penal, ngjarjet që ndodhen në Shkodër para pak ditësh, teksa sulmohej ekipi i një futbolli, nuk do të kishte ndodhur.”
“Dhuna ndaj mjekëve dhe ndaj punonjësve të policisë ka pasur raste të raportuar, nëse Meta nuk do kishte vonuar hyrjen e ligjit nuk do të kishte pasur idiotë që ngrenë dorën ndaj policit dhe mjekut, sepse betimi i tyre prej hipokratit është i betuar për t’i shërbyer jetës së pacientit. Rreshta ambulancash në rrugë, që presin deri sa djali i Fahrit Balliut të përfundojë fjalimin. Zhurmat nëpër zonat turistike të vendit vijuan dhe nëse do ta kishim miratuar kodin, ne do të kishim mundësinë që administratorë të subjekteve private të dënuar”, – tha balla mbi rëndësinë që kishin ndryshimet në Kodin Penal.
/a.r
