Edhe pse ka shumë vite në skenë, Redon Makashi ka zgjedhur të ndërmarrë hapa të sigurt në rrugëtimin e tij muzikor. Kjo është edhe arsyeja pse pas shumë viteve punë, ai ia doli më në fund të çelë studion e tij të parë muzikore, të cilën e prezanton për herë të parë në programin “Rudina” në Tv Klan.
Një strehë krijimtarie, muzike dhe një ‘muze’ i vogël me objekte të dashura e të çmuara për t’i hapur rrugë këngëve të bukura që ai premton se do të vijnë shumë shpejt. Por teksa në jetën profesionale po ndodhin gjëra të bukura, pas buzëqeshjes e gëzimit fshihet një histori tjetër. I pyetur nëse prindërit e kanë vizituar studion e tij, artisti zbulon me trishtim se babai po përballet me një betejë të fortë shëndetësore.
Këngëtari thotë se prej 8 muajsh ai vuan nga sëmundja e demencës dhe është në një luftë me jetën. Gjendja është e vështirë dhe sfiduese, sidomos për nënën e tij.
Redon Makashi: Tani im atë e ka më të pamundur për të vizituar atë studio.
Rudina Magjistari: Pse?
Redon Makashi: Po kalon një moment jo të mirë.
Rudina Magjistari: Që ka lidhje me…
Redon Makashi: Me shëndetin. Ka 8 muaj që po bën luftë me jetën.
Rudina Magjistari: Më vjen keq! Si duket situata, ka shpresë për t’u përmirësuar? Nga se vuan konkretisht, a mund ta thuash?
Redon Makashi: Janë këto sëmundjet që nuk kanë shërim.
Rudina Magjistari: Është sëmundje e kancerit apo…
Redon Makashi: Jo. Demenca. Është pak e vështirë sepse është hera e parë që përballem me një situatë të vështirë direkt sepse të gjithë kemi momente të vështira, por të përballesh direkt me një situatë të rëndë nga një qetësi totale, nga një jetë normale, e qetë kur s’ke çfarë bën, është pak e vështirë.
Rudina Magjistari: Kemi folur në fakt për demencën dhe është e vështirë për atë vetë që nuk e di sa i vetëdijshëm është ai për ta kuptuar gjendjen e vet, por mbi të gjitha edhe për ju, për mamanë tënde, znj. Drita, por edhe për ty.
Redon Makashi: Sigurisht, më tepër mami që është aty në frontin e parë të lëvizjes sepse unë jam në lëvizje, bëj të pamundurën, por është një gjë që lufton dhe nuk ka fund kjo gjë.
Kantautori shton se para pak kohësh babai kreu edhe një ndërhyrje për shkak të një problemi me kockat që ka ndikuar në rëndimin e situatës së tij shëndetësore.
