Babai i Bledi Terpollarit, djali shqiptar që u gjet pa kokë në Greqi, ka reaguar pas arrestimit të bariut dhe dëshmive që dha ai për ngjarjen. Dëshmitari ka treguar edhe vendin se ku ishte groposur koka. Po sipas bariut, menjëherë pas krimit, tre autorët e krimit janë larguar me makinë drejt kufirit. Në dëshminë e tij, 28-vjeçari shqiptar ka pohuar se Terpollari u ekzekutua, pasi kishte fshehur një sasi të konsiderueshme droge që ishte transportuar nga Shqipëria për në Greqi. Gjithashtu, mësohet se policia greke ka lokalizuar vendndodhjen e një prej tre vrasësve të dyshuar, pikërisht në një nga fshatrat kufitare të Janinës, dhe po punon për kapjen e tij, ndërkohë që dy të tjerët dyshohet se tashmë janë në Shqipëri.
Babai i viktimës, Kujtimi, i intervistuar nga Gazeta Shqiptare, thotë se e ka varrosur të birin pa kokë dhe se kjo është e tmerrshme e nuk gjen dot qetësi. “I lutem shtetit të gjejë e të më kthejë kokën e djalit, pastaj le të vdes. Nëse do mësoj se kush ishin personat që më masakruan Bledin, do marr hak, do i vras me duart e mia”, është shprehur ai.
Kanë kaluar dy javë nga vrasja e djalit tuaj dhe ende autorët e krimit nuk janë vënë në pranga. Si ndiheni?
Djali im nuk u vra, por u copëtua barbarisht dhe në mënyrë të pamëshirshme sikur të ishte një kriminel. Por edhe një kriminel nuk e meriton një vdekje të tillë. Nuk e kam idenë kush e ka bërë një gjë të tillë, por nëse e marr vesh, do e vras me duart e mia. Do marr hakun e djalit tim.
Kur e morët nga Greqia trupin e pajetë të Bledarit?
Nuk kanë kaluar shumë kohë që trupit të Bledit i është bërë ceremonia mortore. Kam marrë ku të mundem lekë borxh për t’i bërë nderimin e fundit djalit. Jam zhytur në borxhe, 2000 euro, sepse askush nuk më ndihmoi për të sjellë trupin e tij në vendlindje. Gjithçka e kam paguar vetë. Shpirti im nuk gjen qetësi dhe shpirti i Bledit nuk gjen paqe derisa koka t’i bashkohet trupit (qan)
BW/d.i.
