Avokati i Popullit është një institucion që drejtohet historikisht nga opozita. Në përfundim të mandatit të Erinda Ballancës, propozuar nga Basha, brenda PD ka nisur gara për përzgjedhjen e emrit tëri.
Avokati Ledio Braho duket deri tani më i mbështeturi nga deputetë demokratë për pozicionin e Avokatit të Popullit.
Nga mbledhja e grupimit “Alibeaj” të hënën sipas A2 CNN, Braho kishte marrë 13 vota, ndërsa kandidati tjetër Dorian Gjokmarkaj, i cili është edhe asistenti i Alibeajt ka marrë 6 vota.
Por pritet që preferencën e tyre ta shfaqin edhe 8 deputetë të tjerë që nuk ishin pjesë e takimit.
Ledio Braho, i cili mban aktualisht postin e anëtarit të Komisionit të Ankimimeve dhe Sanksioneve pranë Komisionit Qendror të Zgjedhjeve, thotë ka mbledhur 32 firma nga të dyja grupimet brenda PD, ndërsa Gjokmarkaj 30.
Demokratët e Sali Berishës pritet që të mblidhen të mërkurën për të marrë një vendim në lidhje me çështjen e Avokatit të Popullit. Në listën e kandidaturave është edhe emri i avokatit dhe aktivistit Altin Goxhaj.
Pavarësisht kësaj mësohet se mazhoranca socialiste e ka bërë të qartë se nuk do ta votonte në asnjë rast emrin e Goxhajt për Avokat Populli.
Ky institucion, që prej vitit 2017 drejtohet nga Erinda Ballanca, gjithashtu pjesë e garës për një tjetër mandat.
