Ministri i Shtetit për Marrëdhëniet me Parlamentin, Toni Gogu, ka theksuar rëndësinë e dy projektligjeve lidhur me barnat narkotike dhe lëndët psikotrope, të cilat kanë për qëllim mbylljen e hapësirave të tregut të paligjshëm duke forcuar sigurinë dhe shëndetin publik në vend.
Ai theksoi se këto projektligje janë të lidhura ngushtë me forcimin e sundimit të ligjit dhe harmonizimin me standardet ndërkombëtare dhe direktivat e BE-së.
“Këto projektligje mbyllin hapësirat e tregut të paligjshëm të barnave narkotike dhe lendeve psikotrope dhe lidhen me sigurinë dhe shëndetin publik, shtetin e së drejtës dhe standarde ndërkombëtare. Ju integrimin e vendin e ktheni në spektakël vetëm për të mos folur hallet e qytetarëve. Mbrohet shëndeti publiku, baza ligjore bëhet më e qartë dhe kontrolluese dhe harmonizohen standardet ndërkombëtare duke zhdukur zonën gri”, tha Gogu.
Ministri shtoi se qeveria po forcon gjithashtu kontrollin ligjor për të mbyllur boshllëqet e krijuara nga lëndët narkotike dhe psikotrope. Ai u shpreh gjithashtu se këto projektligje synojnë përditësimin e legjislacionit për t’iu përgjigjur sfidave të reja të tregut të paligjshëm.
“Qartësojmë përkufizimet dhe forcojmë kontrollin ligjor për të mbyllur boshllëqet e krijuara nga zhvillimi i lëndëve të tilla të barnave narkotike dhe lëndëve psikotrope. Po forcojmë kontrollin dhe po përditësojmë me direktivat e BE-së”, tha ai.
