Pesë orë pas një atentati me armë zjarri të ndodhur sot në qytetin e Laçit, policia ka bërë të mundur identifikimin e autorit. Ai është shtetasi Alket Rrema, 32 vjeç, i cili është shpallur në kërkim. Pas një konflikti verbal të çastit për motive të dobëta, Rrema ka qëlluar me armë zjarri ndaj automjetit të shtetasit N.B., i cili për fat të mirë nuk është lënduar.
Të shtënat me armë tip pistoletë paraditen e sotme në qytetin e Laçit të kujtonin skenën e xhirimit të ndonjë filmi me mafioz, ndërsa i riu N.B vraponte për t’ju shpëtuar plumbave… Gjithçka ishte e vërtetë! I riu që udhëtonte me një automjet tip “Benz” në ngjyrë të kuqe, me targë AA 490 Jl, ishte shënjestra e shtetasit Alket Rrema, i cili nuk u ndal së qëlluari me pistoletë, ndonëse rrugët e Laçit ishin të mbushura plot me njerëz.
Breshëria e plumbave u derdh mbi mjetin e shtetasit N.B, por pa e prekur, ndërsa fatmirësisht shpëtuan edhe kalimtarët e shumtë. Pas atentatit autori ka mundur të largohet me autoveturë nga qyteti duke i shpëtuar arrestimit të policisë. Blutë e Kurbinit tashmë ndodhen në vendin e ngjarjes dhe po kryejnë këqyrjen e mjetit që ka lënë aty i riu, i cili ishte edhe objekt i atentatit.
DEKLARATA E POLICISË SË LAÇIT
Më datë 17.09.2016, rreth orës 13.30 është njoftuar se ne afërsi të bankës së vjetër Laç, është qëlluar me armë zjarri në drejtim të mjetit me targa AA 490 JL në pronësi të shtetasit N.B. banues në Laç. Menjëherë në vendngjarje kanë mbërritur shërbimet policore që kanë konstatuar se pas një konflikti verbal të çastit për motive të dobëta mes shtetasve N.B. dhe një shtetasi tjetër, ky i fundit ka qëlluar me armë zjarri në drejtim të automjetit të shtetasit N.B. Për pasojë është dëmtuar vetëm automjeti i shtetasit N.B. dhe nuk ka të lënduar në njerëz. Si rezultat i veprimeve të shpejta hetimore, u bë e mundur identifikimi i autorit të dyshuar, shtetasit Alket Rrema, 32 vjeç, banues në Kurbin i cili u shpall në kërkim. Janë ngritur menjëherë pika kontrolli dhe po bëhet krehja e zonës. Vazhdojnë veprimet hetimore për zbardhjen e plotë të ngjarjes.
