Santiago Malko u ekzekutua mbrëmjen e sotme në Tiranë, teksa ishte duke udhëtuasr me makinën e tij tip BMV X5, në rrugën Xhanfize Keko. Ka qenë ora 22.20 minuta, kur duket se Malko 26 vjeç ka pasur kthimin për në shtëpi, por një atentat i mirëorganizuar i mori jetën.
Santiago Malko është 26-vjeçari që në vitin 2016, ka qenë pjesë e strukturave të Policisë së Shtetit, por përplasja me dy vëllezër; respëktivisht Edmond dhe Gentian Lashi duket se e ka detyruar të largohet nga radhët e Policisë, për t’i zgjidhur konfliktet “jashtë uniformës”.
I riu nuk është i panjohur për Policinë. Ai rezulton të jetë një prej personave me njohje të mirë me Ervis Martinajn, një tjetër person ky i botës së krimit dhe me precedentë penalë si dhe biznesmen i lojërave të fatit.
Malko njihet në kartotekën kriminale të policisë si kontigjent kriminal, dhe i përfshirë në disa ngjarje me armë në Tiranë. Përfshirja e fundit e tij në ngjarje, ka qenë në masakrën e 4 tetorit 2018, ku mbeti i plagosur Ervis Martinaj, Elio Hato dhe i vrarë Fabian Gaxha.
Në atë periudhë, Santiago Malko, u shpall në kërkim policor por pas qetësimit të situatës, Malko është vetëdorëzuar në polici ku dhe ka shpjeguar pozicionin e tij në këtë ngjarje.
A ka apo nuk ka lidhje viktima e mbrëmjes së martë me precedentë të tjerë kjo pritet të zbardhet, por ekzekutimi i tij është shenjë e pastër e hakmarrjes.
Sipas Policisë, i riu është qëlluar në ecje e sipër me mjetin e tij, ndërsa breshëri arme janë derdhur në dritaren e shoferit të mjetit, aty ku ishte pikërisht Malko në timon.
Pas të shtënave, autorët janë larguar për në zonën e Freskut, duke shfrytëzuar edhe momentin e lëvizjeve të pakta të automjeteve në atë zonë. Viktima ka mbetur në makinë për minuta të tëra, ndërsa të parët që mbërritën aty ishte një patrullë e policisë rrugore.
Autorët e dyshuar, sipas Policisë janë larguar në drejtim të fshatit Ferraj, ku dhe kanë djegur mjetin e tyre, tip “Mercedes Benz”. Shërbime të shumta policore kanë ngritur disa pika kontrolli në kryeqytet dhe janë vënë në ndjekje të autorëve.
Specialistë nga Sektori për Krimet e Rënda në Drejtorinë Vendore të Policisë së Tiranës janë angazhuar si pjesë e grupit të posaçëm hetimor për zbardhjen e ngjarjes dhe vënien para përgjegjësisë ligjore të autorëve. Policia e Shtetit fton këdo që ka dijeni për rrethanat e krimit të telefonoje falas në numrin 112.
g.kosovari
