Një atentat mafioz ka tronditur sot Shkodrën.
Dy persona janë qëlluar me armë zjarri ditën e sotme në vendin e quajtur ‘Merkata Rus’ të qytetit të Shkodrës. Sipas informacioneve paraprake policore, ata u qëlluan nga dy atentatorë që udhëtonin me motor.
Të dhënat policore konfirmojnë se njëri prej personave të qëlluar me armë është Fatos Verracaku, i cili ndërroi jetë në spital pasi ndodhej në vdekje klinike. Kurse gjendja e të plagosurit tjetër, F.Mehaj, është stabilizuar nga mjekët.
Policia ka shkuar në vendngjarje dhe ka nisur hetimet për këtë atentat. Ndërkohë, është gjetur i djegur edhe një motor që dyshohet se u përket autorëve të ngjarjes.
Njoftimi paraprak i Policisë së Shkodrës
Sot rreth orës 11:15 në lagjen “Partizani” në vendin e quajtur ‘Merkata Rus’, dyshohet se dy persona me motoçikletë kanë qelluar me armë zjarri në drejtim të shtetasit F.V. 31 vjeç, i cili ka ndërruar jetë në Spitalin Rajonal Shkodër.
Nga të shtënat është plagosur dhe shtetasi F.M., i cili ndodhet jashtë rreziku për jetën nën kujdesin e mjekëve.
Në vendngjarje ndodhet grupi hetimor dhe po punon për sqarimin e rrethanave të ngjarjes.
Policia e Shkodrës e mbështetur nga FNSH Shkodër ka ngritur pika kontrolli dhe në gjithë zonën ku dyshohet se janë larguar autorët.
Policia ka gjetur dhe një mjet motoçikletë të djegur, që dyshohet se u përdor nga autorët, në lagjen ‘Guerrile”.
Po punohet intensivisht për identifikimin dhe kapjen e autorëve.
Policia e Shkodrës fton çdo qytetar që ka informacion dhe mund të ndihmojë, të telefojnë falas në nr 112! /a.ç
