Nga Armando Meta/
Nëse i hedh një vështrim listës ende të paplotë të PD-së të kandidatëve për deputet për zgjedhjet e 25 qershorit, bëhet qartësisht e kuptueshme se disa prej figurave që kanë përbërë dhe profilin e kësaj force politike që në lindje e deri tani, nuk kishte pse të liheshin jashtë liste. Lista gjysmake e deritanishme e PD nuk mund dhe nuk duhet parë bardh e zi. Brenda saj ka jo pak emra, të cilët ja vlen të merren në vlerësim. Por ajo që bie në sy është fakti se në këtë listë gjen me shumicë emra, të cilët jo vetëm nuk kanë ndonjë kontribut në PD, por me plot gojën e kanë parë PD si një ‘lopë për ta mjelë’, duke vënë jo pak para në mënyrë të dyshimtë përsa kohë kjo forcë politike administronte pushtetin. Nisur nga kjo mund të thuhet se nuk gjen asnjë arsye se përse duhej lënë jashtë liste ish- nënkryetarja e PD-së dhe ish- kryetare e parlamentit, Jozefina Topalli, themeluesi i PD-së, Arban Imami, ish- nënkryetari i PD dhe ish kryetar i grupit parlamentar të PD, Astrit Patozi, etj.
Është i vetkuptueshëm edhe reagimi i tyre. Por ky reagim dhe aq më shumë akuzat për shkelje të statutit nga ana e Bashës, qartazi vinë si zëra të vonuar. Për hir të realitetit, që kur erdhi në krye të PD-së, Basha erdhi nëpërmjet një procesi të dyshimitë, të cilin pati kurajon ta denonconte Patozi. Ndërsa të tjerët heshtën. Rrëmuja dhe shkeljet statutore në zëvendësimin e kryetarëve të degëve ishte flagrante. Por përsëri u hesht sipas parimit “s’ka të bëjë me mua, në djallë të tjerët”. Për një kohë të gjatë u fol për vendime që merreshin jashtë kuadrit statutor. Por përsëri u hesht. Nuk u pyet askush për bojkotin e reformës territoriale. Dhe përsëri u hesht. U bojkotua fillimisht Reforma në Drejtësi pa asnjë vendim forumesh. Sërish u hesht. Nuk votohej vetting-u. Sërish u hesht “si fije bari”. Deputetët Majlinda Bregu dhe Eduard Selami denoncuan përpjekjet për të mos votuar vetting-un, madje ata u shpallën armiq të PD-së kur deklaruan votën pro vetting-ut duke dëshmuar se brenda PD-së kishte ende profile perëndimore në krah të SHBA dhe Brukselit. Dhe përsëri u hesht. Edhe kur Bregu u sulmua egërsisht vetëm pse kërkonte që Basha të dëgjonte Brukselin dhe të mos bojkotonte zgjedhjet, askush nuk u ndie. Vetëm pak javë më parë Selami denoncoi me zë të plotë për shkeljet e statutit pasi vendimet për bojkot të Kuvendit dhe të zgjedhjeve si dhe çadra në mes të Bulevardit, ishin marrë pa pyetur as kryesinë, as grupin parlamentar. Ai kërkoi edhe thirrjen e Këshillit Kombëtar. Por përsëri u hesht. Ndonëse vlerësohet se lënia jashtë liste e Topallit, Imamit, Bodes e ndonjë tjetri nuk është e drejtë po të kihet parasysh se shumë prej emrave që gjenden në listën e PD-së janë tërësisht të pamerituar përballë tyre, sërish sot thirrjet e tyre për shkelje të statutit janë tepër të vonuara dhe dëshmi e faktit se në PD flasin për parime e statut vetëm kur preken interesat personale. Shkelja e statutit në PD është bërë ‘modë’. Dhe ata që sot bërtasin, ndër vite kanë qenë ndjekës të kësaj ‘mode’. Ndaj, ata që dje heshtën, sot nuk kanë arsye të ngrenë zërin.
