Arsyet e nervozizmit të “trurit” të opozitës me mediat

Nga Ylli Pata

Nuk janë vetëm politikanët e lartë të Partisë Demokratike që janë nervoz me ata që ata i quajnë “media apo gazetarë të regjimit”. Apo edhe spin-i i PR i aparatit mediatiko-propagandistik të Sali Berishës. Këto ditë e këto orë, ky nervozizëm po vihet re edhe nga “emrat e rinj” të enturazhit “civik” të opozitës që kërkon bashkimin e madh kundër regjimit të Edi Ramës.

Dje, zëdhënësi i Berishës ju vërsul një gazetari që ndjek prej kohësh zhvillimet në opozitë, kurse sot Ermal Hasimja, në një koment të tijin, ishte më shumë se ironik ndaj atyre që vendosin vija të kuqe apo rregulla për opozitën.

Kurse i pari që e shprehu më egër këtë nervozizëm ishte profesori i gazetarisë, Luçiano Boçi, përkatësisht nënkryetar i PD-së. i cili në protestën “kombëtare” të PD-së sulmoi hapur ata që i quajti gazetarë dhe analistë të Edi Ramës.

Një linçim i tillë në një protestë me nerva të ngritura nuk është gjë tjetër veçse listim në defterët e “skulptorëve” ndëshkues, siç u shpreh sot vetë Edi Rama.

I vetmi që, edhe pse ka debatuar me zjarr në panele, por ka mbajtur një ton normal dhe ka diskutuar me argumentet e tij, ka qenë Flamur Noka, i cili në emisionin e Ylli Rakipit u përplas me Baton Haxhiun. Por që ishte një përplasje në kushtet e një diskutimi normal.

E gjithë kjo situatë ngjan vërtet absurde pasi, qoftë okat e opozitës, qoftë “truri” i saj, duhet ta shikonte favorizuese këtë situatë mediatike ku flitet aq shumë për opozitën.

Pasi nëse ka një fushë ku Sali Berisha dominon bindshëm politikisht, ajo ështe media. Raporti më i fundit nga Autoriteti i Mediave Audiovizive, tregonte se Partia Demokratike zë 84.20% të hapësirës televizive në 3 ekranet kombëtare gjatë muajit dhjetor.

7-fish më shumë se sa Partia Socialiste, kurse nga partitë e reja, hapësirë ka fituar Shqipëria Bëhet me 2.24% për shkak të qëndrimit të Adriatik Lapajt përpara kryeministrisë.

Politikanit të cilit i është dhënë më shumë hapësirë nga tre televizionet kombëtare është po Sali berisha, 34.87% kurse kryeministrit Edi Rama 27.83%.

Ndryshimi është se gjatë dhjetorit Edi Rama në daljet e tij është shfaqur si kryeministër për aktivitete publike, kurse Berisha është shfaqur tërësisht për aktivitetin e tij partiak, nga konferencat e përditshme nga selia, foltoret dhe protestat.

Emisionet e darkës, edhe kur ka ngjarjen e aktualitet më të rëndësishëm në ditë, kanë përnatë nga një politikan të rëndësishëm të opozitës, ku diskursi vërtitet rreth argumenteve të “kuzhinës Berisha”. Më pas këto deklarata bëhen lajme në portalet televizive dhe bëjnë xhiron thuajse në të gjithë rrethin mediatik, si tashmë një rregull i ri i lëvizjes së Tokës përreth Diellit.

Çdo forcë politike do të gëzonte në një situat të tillë, kur ka primatin e diskutsit politik në opinion. Në vnde të tjera, edhe pse ka ngjarjen, ku opozita mund të ndërmarrë ofensivën politike, janë politikanët e qeverisjes që ndërhyjnë për të balancuar këtë diskurs.

Në SHBA, me gjithë ato skandale e tragjedi të rënda si vrasjet në Mineapolis, është Trump dhe aparati i tij që mundohem ta mbajnë situatën në primat, duke shvendosur temat.

Në Francën e zhytur në krizë politike e ekonomike, Sarkozy, vendosi syze dielli për të kapur ca like dhe klikime, që më pas të rrotullohen në kozmosin e ri të qarkullimit mediatik modern.

Po përse atëherë janë nervozë politikanët përreth Sali Berishës? Mos duan të llastohen, e jo të thuhen fjalë apo mendime kritike?

Situata duket më e komplikuar se kaq. Një polarizim edhe më i rëndë politik, përkatësisht një ndarje mendje të opozitës për ta rrëzuar Edi Ramën, do të ndodhte vetëm nëse molilizojnë njerëzit për ta bërë një gjë të tillë. Për të nisur një process politik, që siç ndodh gjithkund, përgatit një stinë të re politike, apo ekzaktësisht një ndryshim të madh politik në vend.

Por është pikërisht fjala ndryshim që i shqetëson, pasi ata pëlqejnë frazën rrotacion. E janë më të frustruar se është prishur “rregulli i gjërave” pra rrotacioni i pushtetit. Nga ana tjetër, nëse dë bënin një ndryshim brenda tyre, ai i madhi mund të vijë shpejt, ndoshta edhe menjëherë. Po nëse këtë ndryshim e bën Rama me qeverinë e administratën e tij? Apo SPAK, me në dosje të radhës ndryshon kahun e shënjestrës së tij? Se kemi edhe procesin Partizani, i cili sado të shtyhet do të nisë një ditë. Këto ishin disa, po ka shumë mundësi të ketë edhe arsye të tjera. Gjithsesi është krejt e çuditshme pse janë të mërzitur, pasi rrotacioni siç e quajnë është një proces që kërkon përgatitje. Zgjedhjet e radhës, janë vetëm pas një viti….