Trajneri i Shqipërisë U-21, Alban Bushi, foli në Klan News, me gazetaren Viola Spiro, për listën e Kombëtares A, të bërë publike nga Silvinjo, për ndeshjet “play off” të Botërorit.
Bushi u shpreh se është lista më e mirë e mundshme, referuar lojtarëve që janë në dispozicion. Sipas tij, Manaj do i përshtatej shumë lojës së Silvinjos për duelin ndaj Polonisë.
“Mendoj se është lista më e mirë e mundshme, për arsyen se kemi pasur lojtarë të dëmtuar, si Manaj dhe Daku. Kjo nuk i jepte shumë mundësi zgjedhje Silvinjos. E ka përforcuar shumë mbrojtjen, me Pilos dhe Pllanën.
Mbrojtjen dhe sulmin e kemi të fortë. Mesfusha është stabile. Kanë pasur minuta në ekipet e tyre. Portieriët po ashtu. Strakosha ka bërë shumë mirë. Është një listë e mirë mendoj.
Në ekipet kombëtare, zakonisht nuk prishin shumë punë lojtarët që mungojnë, sepse kemi mundësi zgjedhje. Manaj ka bërë mirë. Ka filluar të shënojë gola. Mendoj se do i përshtatej shumë Polonisë. Është një lojtar që e mbron topin mirë dhe e lodh mbrojtjen”, tha ai.
Bushi theksoi se lojtarët aktualë nuk kanë karakteristikat e Manajt, por shtoi se mund t’i bëjnë dëm polakëve. Po ashtu, ai u shpreh se Ernest Muçi është në formë dhe kundërshtarët e kanë frikë.
“Kur sheh lojtarët si Uzuni, Broja dhe Bajrami, ka karakteristika ndryshe. Nuk është asnjëri si Manaj, për të mbrojtur topin. Por kanë karakteristika të tjera, për të lodhur kundërshtarin.
Muçi i ka karakteristikat për të bërë mirë ndaj Polonisë. Është ndryshe nga Manaj. Do e donte një lojtar me karakteristikat e Manajt trajneri Silvinjo. Kështu mund të përmend Tucin. Muçi është në formë shumë të mirë dhe është entuziast. Polakët e kanë frikë, sepse ka bërë mirë në Turqi. Muçi mund t’i bëjë dëm mbrojtjes polake”, deklaroi Bushi.
Ndeshja Poloni-Shqipëri, do të luhet më 26 mars në Varshavë.
