Një projektligj i ri i Ministrisë së Mirëqenies Sociale dhe Rinisë, synon të transformojë shkollat profesionale, jo vetëm duke i kaluar ato në njësi autonome financiare, por edhe t’u garantojë punën nxënësve që ndjekin këtë arsim. Ministri, Blendi Klosi, në një takim që pati dje me përfaqësues të biznesit dhe dhomave të tregtisë prezantoi projektin, i cili do të marrë formë përfundimtare pasi të marrë edhe konsultën e bizneseve. “Ligji i ri i arsimit profesional bën ligjore lidhjen mes arsimit profesional dhe biznesit. Sipas këtij ligji, nxënësit gjysmën e kohës së shkollës do e kalojnë pranë biznesit. Praktika në biznes është në interes të nxënësve dhe biznesit. Po ashtu, shkollat profesionale kalojnë në njësi autonome financiare. Kjo do të rrisë cilësinë e mësimdhënies.
Qendrat e Formimit Profesional nuk do të zhvillojnë më kurse nëse nuk porositen nga biznesi. Të trajnuarit në qendrat tona të formimit profesional, do të jenë punonjësit e ardhshëm të bizneseve”, tha Klosi. Po ashtu, ai shprehu mbështetjen e tij ndaj ideve të biznesit dhe zhvillimin e tyre pranë qendrave të formimit. Ai ripërsëriti edhe njëherë se në shtator do të dyfishohet numri i nxënësve në arsimin profesional. “Ne menduam ta bëjmë pikërisht tani këtë takim, pasi është i rëndësishëm për realizimin e ri të ligjit për Arsimin Profesional, i cili përpiqet të japë përgjigje të rëndësishme. I pari është tipari i shkollës. Do të kemi një shkollë të mirëfilltë apo qendër kualifikuese? A do të kemi një shkollë që ofron edukimin klasik apo edhe atë profesional që do të shërbejë gjatë gjithë jetës.
Dhe këtë ne duam ta ndajmë me ju, në konceptin e ligjit të ri, Arsimi Profesional është një shkollë që do të ofrojë studimin klasik 3-4 vjeçar por njëkohësisht edhe qendër kualifikimi, të cilat do të jenë edhe për të rriturit”, tha ai. Klosi kujtoi gjithashtu edhe përpjekjet që ministria që ai drejton ka bërë për të mbërritur deri te ky ligj, përmes aktiviteteve dhe panaireve të punës. “Kemi bërë dy aktivitete të rëndësishme, panairin e punës ku pati shumë kompani dhe kërkesa për profesionistë dhe në të cilin zhvilluam diskutime të mëdha për cilësinë e profesionistët. Gjithashtu, dhe panairin ose olimpiadën e aftësisë, e cila vërtetoi edhe njëherë nevojën që në të gjithë vendin ka dëshirë të madhe për arsim profesional, por edhe nevojë për rritje cilësie”, tha ministri. Ndërkaq, përfaqësuesit e biznesit vunë në dukje interesin e lartë për nxënës të kualifikuar, ndërkohë që thanë se duhet të rritet cilësia e shkollave.
ma.me
