Zëdhënësi i Lëvizjes Vetëvendosje, Frashër Krasniqi është arrestuar sot rreth orës 17:00.
Përmes një komunikate për media, Vetëvendosje e ka konfirmuar arrestimin e tij, duke deklaruar se këto sulme e përndjekje ndaj opozitës bëhen çdo herë kur opozita përgatitet për protesta.
Njoftimi i plotë i Vetëvendosjes:
Është arrestuar Frashër Krasniqi, drejtuesi i Sekretariatit për Media dhe Komunikim i Lëvizjes VETËVENDOSJE!.
Frashëri është marrë nga policë civilë rreth orës 17:00 teksa po dilte nga televizioni 21 ku ishte i ftuar që të flasë mbi protestën e së mërkurës.
Tash, kur kanë mbetur vetëm 40 orë deri në protestën e madhe të opozitës së bashkuar, përndjekja e aktivistëve si përpjekje për ta ndalur e dobësuar protestën e 17 shkurtit po vazhdon.
Këto sulme e përndjekje që shtohet sa herë opozita përgatitet për kundërshtim nuk kanë efekt.
Opozita nuk ndalet dhe protesta do të jetë madhështore.
