Kryetari i Dhomës së Avokatisë Lezhë vihet në pranga. Sami Dema, 56-vjeç me profesion avokat në Kurbin është arrestuar ditën e sotme.
Ai ishte shpallur në kërkim, pas akuzave të ngritura nga SPAK më 9 qershor 2020, ndërsa GJKKO kishte caktuar masën e sigurisë “arrest në burg”.
Dema akuzohet për veprat penale ”Korrupsion aktiv i gjyqtarit, prokurorit dhe funksionarëve të tjerë të drejtësisë” dhe “Ushtrimi i ndikimit të paligjshëm ndaj personave që ushtrojnë funksione publike”.
“Shërbimet e Komisariatit të Policisë Kurbin, në vijim të punës për kapjen e personave në kërkim, bazuar në informacionet e marra në rrugë operative për vendodhjen e një shtetasi të shpallur në kërkim, organizuan punën duke bërë të mundur kapjen dhe vënien në pranga të shtetasit në kërkim S. D., 56 vjeç, banues në Kurbin, me profesion avokat.” – njofton policia.
Në vitin 2019, policia ka referuar materialet procedurale në Prokurorinë e Krimeve të Rënda për këtë shtetas.
Prej vitesh me profesion avokat, madje kreu i Avokatisë së qarkut Lezhë, i arrestuari akuzohet se iu merrte para shtetasve të ndryshëm që kishin probleme me drejtësinë, me qëllim për të ndikuar tek prokurori apo gjyqtari, për lehtësim të masës së dënimit.
/a.r
