Në një pyll pranë Berlinit, autoritetet kanë zbuluar një depo që përmbante materiale shumë sensitive. Sipas informacioneve të siguruara nga WDR, NDR dhe Süddeutsche Zeitung (SZ), në depon e ngritur në mënyrë profesionale ishin ruajtur dy armë zjarri funksionale.
Kush i vendosi aty?
Agjencia gjermane e inteligjencës së brendshme, Zyra Federale për Mbrojtjen e Kushtetutës (BfV), raportohet se ka indicie se bëhet fjalë për një vendstrehim të përdorur nga shërbimet ruse të sigurisë. Është një vend i fshehtë ku lihen materiale dhe informacione, i njohur vetëm nga dërguesi dhe marrësi, dhe që mes agjentëve njihet si “kuti postare e vdekur”.
Autoritetet gjermane të sigurisë tashmë dyshojnë se armët janë lënë për agjentë që, në emër të Moskës, do të kryenin të ashtuquajtura “operacione kinetike”, pra akte dhune fizike.
Kreu i shërbimit gjerman të inteligjencës së brendshme, Sinan Selen, kishte paralajmëruar disa muaj më parë se Rusia mund të kryente atentate. Sipas tij, objektiva të mundshëm mund të jenë drejtues të industrisë së mbrojtjes, figura të opozitës në mërgim dhe mbështetës të Ukrainës.
Ambasada ruse vijon të heshtë
Kërkesa që NDR, WDR dhe SZ i kanë dërguar ambasadës ruse deri më tani ka mbetur pa përgjigje. Në të kaluarën, akuza të ngjashme janë hedhur poshtë nga ambasada ruse si teori konspirative. Ajo këmbëngul se nuk ka “sulme hibride” nga Moska ndaj Gjermanisë.
