Kancelari gjerman Olaf Scholz i ka bërë thirrje presidentit rus Vladimir Putin që t’i japë fund pushtimit rus të Ukrainës dhe “vrasjeve të pakuptimta” që po ndodhin në terren.
Duke folur në një konferencë shtypi në Berlin me kryeministrin indian Narendra Modi të hënën, Scholz tha se ajo që “është e rëndësishme është të arrijmë një të ardhme më të mirë së bashku, jo duke bërë luftëra kundër njëri-tjetrit, por duke bërë të mundur zhvillimin ekonomik dhe zhvillimin e përbashkët”, raporton BBC.
Kancelari gjermane i bëri thirrje gjithashtu Putinit që të “tërheqë trupat e tij nga Ukraina”, duke shtuar se “kufijtë nuk duhet të ndryshohen përmes përdorimit të dhunës”.
Kujtojmë që Gjermania kërkon që në paketën e gjashtë të sanksioneve kundër Rusisë të vendoset edhe embargoja e naftës.
Sanksionet e reja kundër Rusisë mund të vendosen që të mërkurën e kësaj jave, thuhet nga qarqet diplomatike në Bruksel. Për të bindur ende vendet skeptike, parashikohet zbatimi me disa faza i sanksioneve. Kështu vendeve anëtare të BE do t’i jepen gjashtë deri në tetë muaj kohë për të diversifikuar burimet e tyre të naftës./m.j
