Deputetja e PS dhe njëherësh Kryetare e PS për Tiranën Blerina Gjyklameti u ka bërë thirrje studentëve që të ulen të dialogojnë me qeverinë për të gjetur një zgjidhje të shpejtë.
Teksa e cilëson një protestë të drejtë dhe të bukur, Gjylameti thekson përmes një postimi në Facebook, se ajo po rrezikon që të kthehet në një parodi për protagonizëm, e mbingarkuar me emocione që vetëm pengojnë rrugëtimin drejt zgjidhjes.
“Nëse ky është modeli që kemi ngritur apo po ngremë është një humbje shumë e madhe. Dialogu, logjika dhe arsyeja duhet të mbizotëronin në këtë çështje, që do zgjidhje dhe zgjedhje. Zgjidhje po kërkohet dhe duhet t’i jepet, por për këtë duhet të bëhen të gjitha palët bashkë në tavolinë dhe të fillojnë një dialog për të bërë më të mirën. Zgjedhja është individuale, por universiteti është i të gjithëve”, shkruan Gjylameti.
Më tej, deputetja socialiste e cila ka edhe një karrierë të gjatë pedagogjike, shpreh bindjen se qeveria ka reflektuar mjaftueshëm për t’i marrë në konsideratë dhe ka për t’i adresuar dhe zgjidhur të gjitha kërkesat, ashtu si do të bënte një prind i mirë për fëmijën e tij.
“Po ai dialog që është pjesë e çdo familje të shëndetshme, po kërkohet edhe në këtë rast. Keni shansin dhe është koha që të ndërtojmë urën e përhershme të komunikimit midis përgjegjësisë publike dhe universitetit. Shansi është i studentëve”, thekson Gjylameti.
/a.rada
