Akti Normativ “anti-KÇK”, është miratuar ditën e sotme në komisionin parlamentar të Sigurisë.
Pas miratimit të këtij akti nga Qeveria në 31 janar, akti i cili synon sekuestrimin e pasurive të krijuara me të ardhura nga krimi, ka marrë një tjetër miratim.
Pas kësaj, akti do të kalojë në Parlament për tu miratuar, ndërkohë që tashmë Operacioni Forca e Ligjit, njësia e ngritur për zbatimin e këtij akti, ka nisur nga puna në terren, qysh prej fillimit të muajit shkurt.
Zëvendës ministrja e Brendshme, Rovena Voda deklaroi sot në komision se në hetime të posaçme, kryesisht hetime pasurore, do të kërkohet mendimi i ekspertëve në fusha të tjera, të cilët do të kenë ndikim në buxhet.
“OFL do të ketë degët e saj edhe në drejtoritë vendore të policive në qarqe. Aksesi në databaza ka filluar. Policia e Shtetit mund të ketë të dhëna në databaza ku nuk ka pasur më parë”, tha ajo.
OFL dërgon fillimisht një formular ku subjektet e shënjestruar për pasurinë e dyshimtë, duhet të provojnë ligjshmërinë e saj.
Këta individë, si subjekt i Ligjit Special, duhet t’u përgjigjen me shkrim, brenda 48 orësh, të gjitha pyetjeve të OFL-së.
Më pas, përgjigjet e marra do t’i dërgohen SPAK-ut, për veprime të mëtejshme.
OFL është në veprim të pandërprerë dhe në kryerje të veprimeve komplekse, për të evidentuar dhe dërguar në SPAK, të gjithë personat që janë subjekt i Ligjit Special.
g.kosovari
