Skënderbeu e ka piketuar përforcimin e parë të verës para përballjeve në “play-off” të Champions League me Dinamon e Zagrebit.
Bëhet fjalë për mbrojtësin e kombëtares shqiptare, Andi Lila. Mbrojtësi i krahut të djathtë ka mbetur pa ekip që pas falimentimit të Parmës në Itali dhe rrëzimit të saj në Serinë D.
Lila deri më tani ka shpresuar arritjen e akordit me ndonjë klub tjetër në Itali, por asgjë nuk ka ndodhur dhe futbollisti vazhdon të jetë i lirë. Ai duhet të bashkohet sa më shpejt me një skuadër për të kapur formën e duhur për sezonin e ri në mënyrë që të vazhdojë të jetë pjesë e kombëtares për kualifikueset e Europianit.
Duke qenë se Skënderbeu të paktën deri në dhjetor do të luajë futboll në nivele të larta duke marrë pjesë në grupet e Ligës së Kampionëve ose Europës, Lila do të kishte mundësinë të bashkohej me një ekip shumë cilësor dhe të tregonte reklamonte veten e tij për ndonjë transferim jashtë shtetit sërish në afatin kalimtar 0të janarit. Në ditët në vazhdim do të mësohet më shumë rreth përpjekjeve të korçarëve me futbollistin kavajas.
