Ambasadorja e Gjermanisë në Tiranë, Susanne Schütz i ka bërë apel politikës të miratojë ligjet e mbetura të reformës në drejtësi dhe të nisë sa më parë zbatimi.
Këto deklarata, ambasadorja i bëri gjatë një takimi në kuadër të “Tetorit gjerman”, aktivitet në të cilin sihte i pranishëm edhe kreu i shtetit Bujar Nishani.
“Këto marrëdhënie në 30 vitet e fundit kanë njohur një zhvillim të shkëlqyer. Për mua, e një rëndësie e veçantë që marrëdhëniet politike janë intensifikuar ndjeshëm me procesin e Ballkanit Perëndimor iniciuar prej Gjermanisë, dhe me dhënien e statusit të vendit kandidat për Shqipërinë.
Vizitat e kancelares Merkel, ministrit të Jashtëm federal, kanë dëshmuar se Shqipëria ndërkohë ka shënuar një progres të rëndësishëm në kuadër të reformave në rrugën e saj drejt përafrimit me BE-në, para se të gjitha në atë të sektorit të drejtësisë, për të cilën miratimi i njëzëshëm i ndryshimeve të Kushtetutës në korrik të këtij viti ishte kapërcimi i një pengese të madhe dhe tani është çështja e miratimit të bazave të mëtejshme ligjore dhe implementimi i tyre.
Unë jam besimplotë, që edhe ju në mënyrë të përsëritur për procesin e përafrimit me Bashkimin Evropian, do t’i mbështesni këto hapa të rëndësishëm brenda mundësive tuaja.”, tha Susanne Schütz.
