Alberto Cutillo, Ambasadori italian në Shqipëri, teksa u shpreh me nota optimiste për miratimin e reformës në Drejtësi, kërkoi më shumë presion nga ana e qytetarëve shqiptarë ndaj politikës.
Nga Shkodra, ai u shpreh se Shqipëria do t’ia dalë të hedhë këtë hap të rëndësishëm për integrimin në BE, pasi kjo është një ndër pikat kyçe për nisjen e negociatave
“Është shumë e rëndësishme reforma në drejtësi. Të gjitha vendet që duan të bëhen anëtare të BE duhet të kryejnë një sërë reformash. Për Shqipërinë drejtësia është kyçe, si një ndër hapat e fundit për këtë proces. Është një udhëtim i mundimshëm por besoj që Shqipëria do t’ia dalë. Jam optimist pasi është një reformë e madhe që ndryshon në disa aspekte. Edhe qytetarët duhet të ngrenë zërin dhe të kërkojnë miratimin e kësaj reforme nga politika”, tha ai.
I pyetur nga gazetarët për takimin me Kryeprokurorin Adriatik Llalla, ai u shpreh:
“Unë kam takime të shpeshta me drejtues të lartë të politikës, prokurorisë, institucioneve të tjera të rëndësishme. Kam bërë një bisedë me të dhe nuk mund të shtoj më shumë se çfarë ka thënë Prokurori. Është një hetim që lidhet me policinë shqiptare, nuk ka lidhje me Italinë”, u shpreh diplomati italian./a.m.
