Delegacioni i BE në Tiranë dhe ambasadat e vendeve të BE kanë reaguar në lidhje me një lajm të publikuar në datën 10 Maj nga një portal pranë opozitës. Në këtë lajm raportohej për takimin mes ambasadores së BE Romana Vlahutin dhe ambasadorëve të vendeve anëtare të unionit evropian.

Përmbajtja e raportuar nga Syri.net e takimit është përgënjeshtruar nga selia e BE dhe ambasadat e vendeve anëtare. “Krerët e Ambasadave të Vendeve Anëtare dhe Delegacioni i BE-së në Tiranë mohojnë kategorikisht përmbajtjen e shkrimit të publikuar nga Syri.net më 10 maj 2017 me titull “Ambasadorët e BE rrëzojnë Vlahutin”. Diskutimet nuk u zhvilluan siç raportohet dhe shkrimi është një trillim i pastër“, thuhet në njoftimin e përbashkët.

Në lajmin e publikuar nga portali Syri.net, thuhej se ambasadorja e BE u kishte kërkuar kolegëve të saj të njohin zgjedhjet e 18 Qershorit edhe nëse nuk merrte pjesë opozita, gjë e cila ishte refuzuar nga diplomatët. Konkretisht, në lajm shkruhej:

“Syri.net mëson nga burime konfidenciale se ambasadorja Vlahutin u ka kërkuar ambasadorëve të vendeve të BE që të njohin rezultatin e zgjedhjeve të 18 qershorit, edhe pa pjesëmarrjen e Partisë Demokratike dhe të partive të tjera opozitare. Ky qëndrim i Vlahutin është në të njëjtën linjë me atë të Kryeministrit Edi Rama, i cili tashmë ka deklaruar se zgjedhjet do të zhvillohen pa opozitën. Por, kjo kërkesë e ambasadores Vlahutin ka marrë një përgjigje të prerë nga të gjithë ambasadorët e 28 vendeve të BE. Ata janë shprehur se nuk do të mbajnë asnjë qëndrim për njohjen e zgjedhjeve edhe pa pjesëmarrjen e opozitës, pa parë protestën e Partisë Demokratike që do të zhvillohet të shtunën më 13 maj në Tiranë.

Fillimisht lajmi u botua me titullin “Ambasadorët e BE rrëzojnë Vlahutin” dhe më pas u ndryshua me titullin aktual: EKSKLUZIVE/ Ambasadorët e vendeve të BE refuzojnë Vlahutin: Nuk mbajmë qëndrim pa parë protestën e opozitës.

Më poshtë shkrimi i përgënjeshtruar nga BE dhe ambasadat e vendeve anëtare:

Ambasadorët e vendeve të Bashkimit Europian kanë dalë kundër ambasadores së delegacionit të BE në Shqipëri, Romana Vlahutin në lidhje me krizën politike në vend.

Paraditen e sotme, në zyrën e Vlahutin tek “Aba Center” u mblodhën ambasadorët e vendeve të BE për të diskutuar për bojkotin e zgjedhjeve nga opozita.

Syri.net mëson nga burime konfidenciale se ambasadorja Vlahutin u ka kërkuar ambasadorëve të vendeve të BE që të njohin rezultatin e zgjedhjeve të 18 qershorit, edhe pa pjesëmarrjen e Partisë Demokratike dhe të partive të tjera opozitare. Ky qëndrim i Vlahutin është në të njëjtën linjë me atë të Kryeministrit Edi Rama, i cili tashmë ka deklaruar se zgjedhjet do të zhvillohen pa opozitën.

Por, kjo kërkesë e ambasadores Vlahutin ka marrë një përgjigje të prerë nga të gjithë ambasadorët e 28 vendeve të BE.

Ata janë shprehur se nuk do të mbajnë asnjë qëndrim për njohjen e zgjedhjeve edhe pa pjesëmarrjen e opozitës, pa parë protestën e Partisë Demokratike që do të zhvillohet të shtunën më 13 maj në Tiranë.

Të njëjtat burime i thanë Syri.net se ambasadorët e vendeve të BE do të shikojnë fillimisht se çfarë do të ndodhë me protestën e së shtunës dhe më pas në bazë të zhvillimeve politike do të mbajnë qëndrim për zgjedhjet.

Kështu, ata u larguan nga zyra e delegacionit të BE pa pasur asnjë dakordësi me ambasadoren Romana Vlahutin. /SYRI.net/