PD-ja ka akuzuar sot kryeministrin Edi Rama se po mban me “pahir” Ardian Dvoranin në Gjykatën e Lartë, edhe pse mandati i tij ka skaduar prej 3 vitesh. Kreu i Departamentit të Rendit dhe Sigurisë, Enkelejd Alibeaj, deklaroi se ndonëse Gjykata Kushtetuese vendosi dhe e shpalli të përfunduar dhe të mbyllur mandatin e Ardian Dvoranit, Rama nuk lejoi zbatimin e këtij vendimi.
“Me urdhrin e tij vendimi i Gjykatës Kushtetuese nuk u publikua në kohë me qëllim të vetëm për të mbajtur në Gjykaten e Lartë të besuarin e tij.Ardian Dvorani vazhdon të okupojë një post gjyqtari në Gjykatën e Lartë. Edhe pse ka 3 vjet që i ka skaduar mandati, edhe pse Gjykata Kushtetuese vendosi se ai duhej të largohej, ushtarin e tij Edi Rama e mban në Gjykatën e Lartë në kundërshtim dhe shkelje të hapur të vendimit të Gjykatës Kushtetuese”, deklaroi Alibej.
Sipas tij Rama dëshmon se nuk i zbaton vendimet e gjykatave kur nuk i interesojnë, mban me çdo kusht veglat e tij në gjyqësor.
“Me Dvoranin e përjetshëm në shërbim të tij, me prenotimin e 25 vendeve në prokurori e gjykata për ushtarët e tij duke bërë pseudo-konkurs pa shpallje e pa transparencë në shkollën e magjistraturës, me çdo rast që i jepet, Edi Rama po dëshmon se nuk do drejtësi të pavarur e profesioniste, por drejtësi të kapur e nën urdhërat e tij. Ky është delegjitimimi më kriminal dhe i shëmtuar i drejtësisë. Partia Demokratike e dënon ashpërsisht, e shpall të papranueshëm dhe nuk do ti pranojë kurrë Dvoranët e Ramës. Ata do të largohen nga zyrat që okupojnë, me hir apo me pahir”, deklaroi Alibeaj.
ma.me
