Kryeministri Edi Rama, në episodin e 15-të të podkastit “Flasim”, sezonin e gjashtë, kishte të ftuar kompozitorin shqiptar me karrierë ndërkombëtare në Hollywood, Aldo Shllaku.
Historia e tij u soll si një shembull i fuqishëm i suksesit të diasporës shqiptare, në kuadër të reflektimeve për Samitin e IV të Diasporës.
“Origjinën e kam nga Shkodra, por jam lindur dhe rritur në Elbasan për shkak të internimit të familjes. Pas shkollës së mesme ika jashtë vendit,” tregoi ai, duke kujtuar fillimet e jetës së tij. Pas përfundimit të shkollës së muzikës “Onufri” dhe rënies së regjimit, ai emigroi fillimisht në Greqi e më pas në Kanada, ku nisi studimet për kompozicion në Montreal. Në Kanada u mora me kompozicion. Mbarova studimet në Montreal dhe më pas shkova për studime pasuniversitare në Los Angeles,” shtoi Shllaku.
Në University of Southern California, një nga institucionet më prestigjioze për muzikën e filmit, ai hodhi hapat vendimtarë të karrierës.
“Ndejtja atje dhe puna me profesorin që merrej me muzikë filmash ishte shkolla e vërtetë. E ndihmoja për temat, orkestrën, isha asistent i tij,” rrëfeu kompozitori.
Kjo eksperiencë i hapi rrugën bashkëpunimit me kompozitorin e njohur Christopher Young, duke kontribuar në projekte të mëdha si “Spider-Man 2” dhe “Spider-Man 3”.
Pas pesë vitesh si asistent, ai vendosi të ndërtonte rrugën e tij të pavarur.
“Punova 5 vjet dhe më pas vendosa të vazhdoj vetë. Projekti i parë ishte një serial filmash animacion dhe më pas erdhën projekte të tjera,” tregoi ai.
Me një karrierë dydekadëshe në industrinë globale të filmit, Shllaku rrëfeu se periudha e pandemisë ishte më e vështira.
“Momenti më i vështirë ka qenë COVID-i. U mbyll çdo gjë dhe ishte një situatë shumë konfuze,” tha ai.
Aktualisht, ai punon paralelisht në disa projekte.
“Ky është viti më i angazhuar që kam pasur, kam rreth 6 projekte në të njëjtën kohë dhe punoj me asistentë ndërkombëtarë,” u shpreh Shllaku.
Duke folur për zhvillimet teknologjike, ai u shpreh skeptik ndaj përdorimit të inteligjencës artificiale në muzikë.
“Ende nuk e pranoj inteligjencën artificiale në këtë fushë. Ka ligje që, kur përdoret AI, nuk mund ta quash më pronësi intelektuale muzikën që prodhon,” tha kompozitori.
Shllaku ndau detaje nga bashkëpunimet e tij me emra të mëdhenj të kinemasë botërore, si Robert De Niro, Morgan Freeman dhe Tommy Lee Jones.
Një nga kulmet e karrierës së tij mbetet puna për muzikën e filmit “The Comeback Trail”, me regji të George Gallo.
“Ishte një privilegj të punoja si kompozitor në një produksion me aktorë të nivelit më të lartë të Hollywood-it,” u shpreh ai.
Ai njoftoi gjithashtu se do të rikthehet në korrik për tre shfaqje të muzikës së filmave të tij, me orkestrën e TOB, në Tiranë, Shkodër dhe Prishtinë.
