Shoqëria Albpetrol ka reaguar përmes një deklarate të shpërndarë për mediat, pas pezullimit nga detyra me vendim të Gjykatës së Vlorës, të drejtorit Endri Puka.
Sipas Albpetrol, shoqëria ka zbatuar me përpikmëri ligjin në çdo rast, ndërsa paralajmëron se do ankimojë në Gjykatën e Apelit, vendimin për pezullimin nga detyra të drejtorit.
Një një deklaratë të shpërndarë për mediat, Albpetrol sqaron se që nga fillimi i këtij viti kompania ka prishur 6 Marrëveshje Hidrokarbure me kompani të ndryshme që operonin në fushën e kërkimit dhe shfrytëzimit të hidrokarbureve në vendin tonë.
Arsyet kryesore të prishjes së kontratave janë mos pagesa e detyrimeve, mos kryerja e investimeve, kushtet skandaloze mjedisore dhe të sigurisë teknike, mos pagesa e rrogave të punonjësve etj, sqaron Albpetrol.
Sipas deklarates se Albpetrol, prishja e koncesionit të fundit, atij të Amonicës, ka bërë që kontraktori Phoenix Petroleum dhe aksionerët e tij, Isuf Berberi dhe Neim Kasaj, të bëjnë disa kallëzime penale në prokurori, ankime të shumta në institucione të ndryshme, si dhe u angazhuan në një fushatë personale shpifjesh në portale e media te ndryshme. Kallëzimet penale kanë të njëjtën fabul, pretendimin e kompanisë koncesionare për prishjen e padrejte të Marrëveshjes Hidrokarbure.
Njoftim për shtyp
Shoqëria Albpetrol sh.a që nga fillimi i këtij viti ka prishur 6 Marrëveshje Hidrokarbure me kompani të ndryshme që operonin në fushën e kërkimit dhe shfrytëzimit të hidrokarbureve në vendin tonë. Arsyet kryesore të prishjes së kontratave janë mos pagesa e detyrimeve, mos kryerja e investimeve, kushtet skandaloze mjedisore dhe të sigurisë teknike, mos pagesa e rrogave të punonjësve etj. Përveç dëmit që i kanë shkaktuar Albpetrol, këto shoqëri, i kanë shkaktuar edhe miliona dollarë dëme buxhetit të shtetit nëpërmjet kontrabandës, falsifikimeve, mospagimit të taksave etj. Është hera e parë që Albpetrol me mbështetjen e MEI po vepron me vendosmëri për të prishur çdo kontratë që nuk respektohet.
Prishja e koncesionit të fundit, atij të Amonicës, ka bërë që kontraktori Phoenix Petroleum dhe aksionerët e tij, Isuf Berberi dhe Neim Kasaj, të bëjnë disa kallëzime penale në prokurori, ankime të shumta në institucione të ndryshme, si dhe u angazhuan në një fushatë personale shpifjesh në portale e media te ndryshme. Kallëzimet penale kanë të njëjtën fabul, pretendimin e kompanisë koncesionare për prishjen e padrejte të Marrëveshjes Hidrokarbure.
Albpetrol ka bashkëpunuar në çdo rast pavarësisht kallëzimeve e ankesave absurde duke vënë në dispozicion çdo dokumentacion dhe duke dhënë edhe shpjegime kur janë kërkuar. Ndërkohë 4 muaj pas prishjes së kësaj marrëveshje gjendemi të akuzuar për të njëjtën vepër nga dy prokurori të ndryshme. Prokuroria e Tiranës na akuzon se marrëveshja është prishur pa kaluar afati ligjor dhe se kemi dëmtuar shoqërinë, për më tepër duke përdorur edhe organe dhune si Policia e Shtetit. Pra, sipas tyre, kemi dëmtuar interesat e kompanisë Phoenix Petroleum. Ndërkohë Prokuroria e Vlorës na akuzon se është prishur marrëveshja pasi kishte kaluar afati ligjor. Pra kemi favorizuar kompaninë Phoenix Petroleum sepse marrëveshja duhet të ishte prishur më parë. Faktet janë të njëjta, interpretimet e prokurorisë janë të ndryshme, por e përbashkëta e tyre është se të dyja prokuroritë shkojnë në masa ekstreme kundër nesh. Ajo që na shqetëson më tepër është fakti se në të dyja rastet vendimet merren pa dëgjuar fare opinionin e Albpetrol. Jemi të sigurt se nëse do të na jepej mundësia të shpjegoheshim, një e drejtë kjo që na takon me ligj, nuk do të ndodheshim para një situate të tillë absurde.
Albpetrol dhe drejtuesit e tij janë besimplotë se kanë zbatuar korrektësisht ligjin dhe pavarësisht presioneve të këtyre kompanive që kanë abuzuar prej vitesh me pasuritë tona kombëtare, do të vazhdojnë punën e nisur për t’i rikthyer publikut të gjitha fushat naftëmbajtëse të cilat shfrytëzohen pa respektuar kontratën dhe pa shlyer detyrimet.
Vendimi për pezullimin e Administratorit të Albpetrol sh.a është ankimuar në Gjykatën e Apelit të Vlorës./javanews.al/a.ç
