Me një varg akuzash në drejtim të partive në pushtet, Lëvizja Vetëvendosje ka prezantuar kandidatin për kryeministër, Albin Kurti, dhe 109 kandidatët e tjerë për deputetë në zgjedhjet e parakohshme parlamentare të 11 qershorit.
Duke e quajtur këtë listë “të fitores” përfaqësuesit e kësaj partie kanë akuzuar partitë në pushtet për përçarje të njerëzve dhe bashkim “të të korruptuarve dhe kriminelëve”.
E këto fjalime u përcollën edhe me brohoritje të masës “hajnat në burg”.Kandidati për kryeministër nga kjo parti, Albin Kurti, ka theksuar se në zgjedhjet e fundit Lëvizja Vetëvendosje është dëshmuar se nuk është eksplozivi dhe se do të bashkëpunojë me të tjerët kundër planeve të Serbisë, kundër korrupsionit në Kosovë dhe për të mirën e qytetarit të Republikës.
Por, sipas tij, ata nuk do të bashkëpunojnë me të tjerët për të “keqen e popullit dhe për luksin e pushtetarëve”, shkruan “Koha Ditore”.
“Pushteti në Kosovë i ka ndarë dhe përçarë njerëzit, kurse i ka bashkuar të korruptuarit dhe kriminelët. Ne duhet t’ia shërojmë plagët që i kanë shkaktuar qeveritë njëra pas tjetrës dhe për këtë gjë e kemi edhe gatishmërinë, edhe vullnetin, edhe programin, edhe guximin, edhe arsyen, edhe interesin, edhe dijen edhe imagjinatën”, ka theksuar Kurti, përgatiti Koha. (b.an)
