Në disa media online sot ka qarkulluar lajmi për pushime masive dhe mbyllje të gazetës “Shqiptarja.com”.
Por, vetë gazetë sqaron se ky është një lajm i sajuar nga mediat xheloze.
“Shqiptarja.com online (që vazhdon të rritet përditë) dhe Shqiptarja.com në print do të vazhdojnë të jenë në treg edhe më të fortë se më parë. Domosdoshmëria për të rishikuar kostot lind sigurisht nga një krizë e tregut që ka reduktuar në mënyrë drastike (në Shqipëri dhe në Europë) të ardhurat nga reklamat. Dikush i ka zëvendësuar këto humbje me gjobat që i vendos politikës, me paratë e pista apo me borxhet që nuk ua kthen bankave. Shqiptarja.com nuk ka asgjë nga këto.
Arrijmë ta kuptojmë që ky rrugëtim profesional është i pakapshëm për disa “botues”, të cilët as nuk e dinë se ç’është një bussines-plan dhe që janë të gatshëm të humbin miliona e milionë lekë vetëm për të mbajtur në jetë “kallashnikovin e tyre me bojë” që duhet ta përdorin për të fituar tendera e të jetojnë me imunitet duke u mbrojtur pas një shantazhi të përjetshëm. Për ta, një gazetë, një TV apo një faqe on line janë vetëm armë shumë të kushtueshme për t’u përdorur në mbrojtje të pisllëqeve të tyre politike apo financiare. Ndërsa për ne një media është vetëm një sipërmarrje për të ofruar informacion profesional.
Kuptojmë gjithashtu se nisma e riorganizimit e ndërmarrë nga administrata e grupit Shqiptarja.com është e pakuptueshme edhe për ata “botues” që financojnë humbjet e mediave të tyre duke shitur birrë apo duke shtuar borxhet në banka me kredi që nuk i kthejnë asnjëherë e duke mos paguar për muaj të tërë gazetarët. Ose, presin që Djali i dikujt, të paraqitet në fund të muajit në redaksi për të paguar nga xhepi i tij rrogat.
Shqiptarja.com nuk i përket këtyre kategori mediash. Objektivi ynë është ai i konsolidimit të bilanceve tona për të garantuar stabilitet ekonomik (e garanci për rrogat) për punonjësit dhe te respektojmë lexuesit”, thuhet në reagimin e saj zyrtar.
Ndërsa bashkëshortja e Carlo Bolinos, Alba Malltezit, që është pronar i gazetës, është më e drejtëpërdrejtë.
Ajo akuzon mediat e Irfan Hysenbelliut për shpikjen e këtij lajmi.
“Ua perserisnim dikur gjithmone ish- gazetareve qe tani si model nga Karlo, kane Kasemogazetarine …. … ah me falni, edhe Cimpekerine… brrr”, shkruan ajo.
