Është mbajtur këtë të shtunë seanca e masës së sigurisë ndaj dy të arrestuarve Petrit Cakrri dhe Fation Bushgjokaj, autorë të dyshuar të rrëmbimit dhe vrasjes së 23-vjeçari Renis Dobra.
Prokuroria kërkoi arrest me burg për dy të dyshuarit e vrasjes së të riut dhe paraqiti provat paraprake të përfshirjes së tyre në ngjarjen kriminale të ndodhur me datë 8 Korrik.
Kërkesa u miratua nga gjyqtarja Enkeleda Halilaj, e cila i dha prokurorisë kohë për të përfunduar hetimet. Arresti me burg u arsyetua me argumentin e largimit të mundshëm të dy të dyshuarve si dhe prishjen e provave.
Mësohet se dy të akuzuarit kanë mohuar para trupit gjykues vrasjen e të riut Dobra.
Petrit Çakrri së bashku me tre vëllezërit Fation, Aleksandër e Kristi Bushgjokaj akuzohen se rrëmbyen, dhunuan dhe mbytën me litar duke e hedhur më pas në liqenin e Shkopetit, 23 vjeçarin Renis Dobra nga fshati Zenisht i Matit.
Dy nga vëllezërit Aleksandër e Kristi Bushgjokaj dyshohet se janë larguar jashtë shtetit nëpërmjet Kosovës.
Ngjarja dyshohet të ketë lidhje me përfshirjen në një aktivitet të paligjshëm në Gjermani mes viktimës dhe vëllezërve Bushgjokaj për një sasi lënde narkotike të zhdukur.
Ndërkohë policia është vënë në kërkim të vëllezërve të larguar, të cilët janë identifikuar si të përfshirë në ngjarje nëpërmjet kamerave të sigurisë në qytetin e Burrelit dhe ato të bizneseve në rrugën nacionale Burrel – Skuraj.
