Mediet në Kosovë raportojnë arrestimin e 5 shtetasve turq, drejtues të institucioneve shkollore turke në vend, të identifikuar nga Ankaraja si mbështetës të kundërshtarit të hapur të presidentit Recep Tayyip Erdogan, klerikut Fetullah Gulen. Prangosjet ndodhen mëngjesin e kësaj të enjteje në Prishtinë e Gjakovë. Burimet sqarojnë se, të ndaluarit i përkasin rrjetit arsimor “Gülistan Educational Institutions”.
Arrestimet i konfirmoi edhe policia kosovare, që thotë se aksioni i saj, i nisur orët e para të ditës, po vazhdon, e për këtë arsye është treguar e kufizuar në detaje.
Personat e ndaluar po mbahen – sipas saj, – në divizionin për të huajt, deri në përfundimin e procedurave të deportimit.
Ndërhyrja e forcave të rendit ka ardhur pas disa hetimeve të zhvilluara mbi këto institucione.
Drejtori i përgjithshëm Mustafa Erdem u arrestua ndërsa po shkonte për në punë, ndërsa zëvendësi i tij Yusuf Karabina dhe profesorët Cihen Ozkan e Hasan H. Gunakan janë marrë nga ambientet e objekteve shkollore. I arrestuar është edhe drejtori i një prej kolegjeve “Mehmet Akif”, Kahraman Demirez./a.m.
