Policia e Shtetit ka reaguar në lidhje me akuzat e Partisë Demokratike për arratisjen e një shtetasi turk nga Rinasi. Nëpërmjet një njoftimi zyrtar, Policia sqaron se ky shtetas nuk ishte në kërkim, por i është refuzuar hyrja pas verifikimit të dokumenteve pasi nuk justifikonte qëllimin e udhëtimit. Sipas policisë, ky shtetas u largua në momentin kur ndodhej në zonën e tranzitit duke përfituar nga numri i madh i udhëtarëve. Policia po punon për kapjen e tij dhe kthimin në shtetin turk.
Ja njoftimi i policisë:
Rinas.
Sot më datë 08.08.2016 ka ardhur nga Stambolli për në Shqipëri shtetasi turk I. E.
Pas intervistimit nga Policia Kufitare, këtij shtetasi i është refuzuar hyrja për Shqipëri pasi nuk justifikionte qëllimin e udhëtimit.
Sipas procedures ai u transferua përkohësisht në zonën e tranzitit deri në përfundim të procedurave për kthimin e tij në Stamboll.
Gjatë kohës që ky shtetas qëndronte në këtë zonë, duke përfituar nga fluksi i madh i pasagjerëve ka dalë duke kaluar tek zona e kontrollit të pasagjerëve dhe më pas ka hyrë ilegalisht në Shqipëri.
Dokumentat e identifikimit të shtetasit turk ndodhen tek oficeri i Policisë kufitare pasi oficeri po plotësonte dokumentacionin përkatës.
Gjithashtu theksojmë se motivi i refuzimit paraprak i hyrjes në Shqipëri ishte mungesa e arsyes bindese të udhëtimit
Ky shtetas nuk rezulton person në kërkim apo me probleme me drejtësinë.
Vazhdon puna për sqarimin e plotë të rrethanave të ngjarjes si dhe kapjen e shoqërimin e shtetasit turk për ta dërguar drejt Turqisë.
