Pas Ambasadës britanike, e cila ka reaguar ndaj akuzave të artikuluara nga ana e politikanëve shqiptarë kryesisht të opozitës dhe të kreut Lulzim Basha ndaj kompanisë Crown Agents, këtë radhë është kjo e fundit e cila ka përgënjeshtruar akuzat. Në një komunikatë për mediat, Crown Agents apelon për paraqitje faktesh dhe provash mbi akuzat e bëra për korrupsion.
Crown Agents, kompania britanike e punësuar nga qeveria shqiptare për të mbikqyrur doganat hedh poshtë akuzat dhe hamendësimet pë korrupsion në procesin e marrjes dhe zbatimit të kontratës.
Kompania britanike, duke ecur në një linjë me ambasadën britanike, kërkon që të paraqiten fakte për akuzat e bëra ose në të kundërt këto akuza të tërhiqen. Crown Agents informon se nuk ka ndërmend të përfshihet në një debat politik mbi llojin e punës që ka bërë dhe vazhdon të bëjë në Shqipëri ndërsa paralajmëron se do të marrë masat e nevojshme ligjore për të mbrojtur reputacionin.
“Këta individë nuk kanë paraqitur asnjë provë të vetme në mbështetje të këtij pretendimi dhe as që do të kenë mundësinë ta bëjnë diçka të tillë sepse pretendimet e tyre janë plotësisht të pavërteta. “Crown Agents punon mbi bazën e standardeve më të larta të ndershmërisë dhe integritetit dhe çdo akuzë për korrupsion merret shumë seriozisht nga ne.Njëkohësisht, ne do të ndërmarrim të gjitha masat e nevojshme e të duhura për të mbrojtur dhe ruajtur reputacionin tonë ndërkohë që përballemi me akuza të pabaza”, theksohet në deklaratë.
