RJ Mitte, aktori amerikan që interpretoi Walter “Flynn” White Jr. në serialin e njohur “Breaking Bad”, ka ndërruar jetë në moshën 34-vjeçare, raportoi TMZ.
Një zyrtar i qarkut konfirmoi për median amerikane se aktori vdiq të hënën në Teksas. Sipas TMZ-së, dyshohet se vdekja ka ardhur si pasojë e vetëvrasjes. Autoritetet kanë bërë të ditur se hetimet për rastin janë ende në zhvillim.
Përfaqësuesit e Mitte-s konfirmuan lajmin për TMZ-në dhe shprehën pikëllimin për humbjen e tij.
“Me dhimbje të madhe njoftojmë ndarjen tragjike nga jeta të RJ Mitte-s, aktorit të dashur, filantropit dhe zëdhënësit për të drejtat e personave me aftësi të kufizuara”, thuhej në deklaratën e tyre.
Roli i Walter White Jr., djalit të personazhit kryesor Walter White, e bëri Mitte-n të njohur në mbarë botën. Ai u shfaq në 56 episode të serialit të vlerësuar “Breaking Bad”.
Aktori, i cili vetë jetonte me paralizë cerebrale, shfrytëzoi përvojën e tij për të ndërgjegjësuar publikun rreth aftësisë së kufizuar dhe rëndësisë së përfshirjes. Ai ishte gjithashtu ambasador i organizatave United Cerebral Palsy dhe Shriners Children’s.
Përveç rolit në “Breaking Bad”, Mitte mori pjesë edhe në produksione të tjera, mes tyre “The Oak Room”, “The Recall” dhe “The Guardians of Justice (Will Save You!)”.
Në jetën private, aktori ishte i fejuar me Kennedy Suarez. Ai i kishte propozuar asaj në vitin 2025, pas disa vitesh lidhjeje.
