Partia Demokratike dhe Policia e Shtetit kanë replikuar në distancë në lidhje me një aksion anti-kanabis të ndërmarrë nga Forcat e Ndërhyrjes së Shpejtë në Malësinë e Madhe.
Aksioni nisi disa orë pasi kreu demokrat Lulzim Basha zhvilloi takimin elektoral të rradhës ku prezantoi kandidatin për bashkinë në zgjedhjet e 21 Qershorit.
Por aksioni policor u konsiderua nga PD-së si presion ndaj banorëve që ishin pjesëmarrës në mitingun e kësaj partie.
Krahas degës së PD në Malësinë e Madhe edhe Kreu i Grupit Parlamentar të opozitës Edi Paloka akuzoi qeverinë se po ushtron presion ndaj simpatizantëve demokratë që morën pjesë në miting. Paloka kërkoi ndërhyrjen e ndërkombëtarëve që të monitorojnë situatën ndërsa kërkoi nisjen e hetimeve
Por Zëdhënësi i Policisë së Shtetit në një reagim hodhi poshtë akuzat e PD-së duke deklaruar se aksioni i FNSH-së ishte në kuadër të operacionit antikanabis që është ndërmarrë në të gjithë vendin.
Më poshtë deklarata e plotë për mediat e Edi Palokës:
“Edi Rama po vazhdon në rrugën e dhunës me të cilën ka nisur këtë fushatë zgjedhore. E filloi me banditë të veshur si militantë, që të urdhëruar realizuan aktet e dhunës në Durrës e në Ersekë. Ndërsa mbrëmë urdhëroi angazhimin e banditëve militantë, të veshur me uniforma policie. Menjëherë pas takimit të suksesshëm të kryetarit të Partisë Demokratike në Malësinë e Madhe, Rama ,nëpërmjet sejmenëve të tij, urdhëroi raprezalje ndaj pjesëmarrësve në prezantimin e kandidatit të Partisë Demokratike, z.Anton Koka. Kontrollet e dhunshme nga efektivë të FNSH-së dhe komisariatit të Malësisë së Madhe në banesat e pjesëmarrësve në takimin e zhvilluar nga Partia Demokratike, janë një presion i hapur politik kundër opozitës dhe mbështetësve të saj. Partia Demokratike i paralajmëron jo vetëm urdhërdhënësit por edhe ekzekutorët e këtyre urdhrave të paligjshme që dhunojnë qytetarët e këtij vendi për bindje politike se individualisht, një për një, do të japin llogari shumë shpejtë. Partia Demokratike i bën thirrje misionit të OSBE-ODIHR-it, dhe përfaqësive diplomatike të BE-së dhe SHBA-së, të monitorojnë nga afër këtë përshkallëzim të dhunës dhe terrorit qeveritar. Ne i bëjmë thirrje organeve të drejtësisë të nisin menjëherë hetimet dhe të venë para përgjegjësisë dhunuesit dhe urdhëruesit e dhunës policore. Edi Rama ky burracak, që ëndërron se me dhunë e terror do t’i shpëtojë fundit të tij të pashmangshëm , vetëm shkallën e parë të gjykimit e ka në 21 qershor. Vendimin përfundimtar, për klikën e tij por dhe për atë personalisht, shqiptarët e kanë marrë.” tha Paloka
