Presidenti Ilir Meta ka reaguar për aksidentin e rëndë të ndodhur mëngjesin e sotëm në Vlorë. Në një postim në mediat sociale, Presidenti shkruan se ajo që ndodhi këtë mëngjes është një ngjarje e rëndë dhe i bashkohet dhimbjes së të afërmeve të familjes Gushi.
Më tej kreu i shtetit i bën apel Policisë Rrugorë dhe të gjitha strukturave përgjegjësi që të parandalojnë tragjedi të tilla. Po ashtu u kërkon qytetarëve që të ecin me kujdes, pasi shpejtësia vret.
“Kam përcjellë me trishtim shumë të thellë lajmin e rëndë të humbjes së familjes Gushi në një aksident tragjik në aksin rrugor Fier-Vlorë. I bashkohem dhembjes së të afërmve dhe ju shpreh ngushëllimet më të ndjera! Zoti t’ju japë forcë për të përballuar këtë tragjedi, që na ka tronditur sot të gjithëve.
Duke kërkuar një hetim të plotë, i apeloj Policisë Rrugore dhe çdo strukture tjetër përgjegjëse, të marrin të gjitha masat efektive për të parandaluar të tilla tragjedi, sidomos në këtë periudhë të ngarkuar të sezonit turistik. Ju bëj thirrje të gjithë qytetarëve të udhëtojnë me shumë kujdes! Shpejtësia vret!”, shkruan Meta.
Ky reagim vjen pas aksidentit të rendë ku humbën jetën 4 anëtarë të familjes Gushi nga Patosi dhe u plagosën 3 të rinj që udhëtonin në një makinë tjetër.
/a.r
