Ministria e Shëndetësisë ka reaguar ndaj një tjetër shkrimi që prek çështjen e ambulancave të thirrura në vendngjarje aksidentesh. Këtë herë bëhet fjalë për aksidentin e ndodhur në Laprakë, ku gjeti vdekjen një grua 58 vjeç. MSH tregon se ambulanca ka mbërritur në vend vetëm pesë minuta pas marrjes së thirrjes.
“Në përgjigje të shkrimit me titull: “Laprakë, kalimtarja përplaset për vdekje nga makina. Qytetarët ulurasin për ambulancën”, të botuar dje (15/10/2016) në portalin informativ online “Mapo.al” ku raportohet për një aksident të rëndë automobilistik me pasojë vdekjen e një 58-vjeçareje që ka ndodhur dje pasdite në zonën e Laprakës në Tiranë, sqarojmë se autoambulanca e shërbimit të urgjencës së Tiranës ka mbërritur për vetëm 5 minuta në vendngjarje pas marrjes së thirrjes.
Siç edhe mund të verifikohet fare lehtësisht nga video e regjistrimit elektronik të shërbimit të urgjencës nëpërmjet sistemit GPS të aktivitetit të lëvizjes në terren të autoambulancës “TR 9915 K Urgjenca e Tiranës”, thirrja për t’i ardhur në ndihmë personit në nevojë nga intoksikimi alkoolik është marrë nga centrali i shërbimit të urgjencës mjekësore në orën 19:10 dhe ka mbërritur në vendngjarje për t’i ardhur në ndihmë qytetares në fjalë në 19:15.
Po ashtu, qytetarja është transportuar për në spital në orën 19:18.
Pra, siç mund të shihet qartësisht, autoambulancës i janë dashur 5 minuta për të mbërritur në vendngjarje dhe 8 minuta gjithsej për të transportuar qytetaren në spital pas marrjes së thirrjes.
Bashkëlidhur njoftimit, do të mund të gjeni kopje elektronike të videos praktikës së gjurmimit me sistemin GPS të instaluar brenda autoambulancës për rastin në fjalë nga ora 19:11 deri në orën 19:20”, thuhet në deklaratën e ministrisë.
